"ქართული ოცნების" ფოთის მაჟორიტარი კანდიდატის ეკა ბესელიას საარჩევნო შტაბი "ელიტა-ბურჯის" ადვოკატის, იმედა ნიკურაძისთვის 20-დღიანი ადმინისტრაციული პატიმრობის შეფარდების ფაქტს ეხმიანება და განცხადებას ავრცელებს.
განცხადებაში აღნიშნულია, რომ ბესელიას საარჩევნო შტაბი სოლიდარობას უცხადებს ნიკურაძეს და მიიჩნევს, რომ მისი დაკავება და სასჯელი - 20-დღიანი ადმინისტრაციული პატიმრობის სახით, არის უკანონო.
"არახალია, რომ ხელისუფლება აგრძელებს პოლიტიკურ ანგარიშსწორებებს უკანონო სასამართლო დაგაწყვეტილებებით ყველა პოლიტიკური მოწინააღმდეგის მიმართ, მაგრამ საგანგაშოა, რომ ისინი ღიად გადავიდნენ ადვოკატების დაკავებებზედაც. გასაგებია, რომ ხელისუფლების წევრები აგონიაში არიან, მაგრამ მოვუწოდებთ, დაუბრუნდნენ კანონის ფარგლებს, შეწყვიტონ პოლიტიკური ნიშნით დევნა უდანაშაულო ადამიანებისა, რადგან შეუძლებელია დაშინება და დაშანტაჟება საკუთარი მოსახლეობისა, რომელიც მალე გამოუტანს განაჩენს თვით ხელისუფლებას ყველა უკანონობის გამო", - ნათქვამია განცხადებაში.
შეგახსენებთ: თბილისის საქალაქო სასამართლოს გადაწყვეტილებით, "ელიტა-ბურჯის" ადვოკატს, იმედა ნიკურაძეს 20-დღიანი ადმინისტრაციული პატიმრობა შეეფარდა.
