საგარეო საქმეთა მინისტრის გრიგოლ ვაშაძის იაპონიაში ვიზიტის ფარგლებში, 19 ივლისს, შედგა შეხვედრა იაპონიის პარლამენტის მრჩეველთა პალატის საგარეო ურთიერთობათა და თავდაცვის კომიტეტის თავმჯდომარესთან, ტეცურო ფუკუიამასთან.
იაპონიის მრჩეველთა პალატაში გამართულ შეხვედრაზე ხაზი გაესვა ორ ქვეყანას შორის საპარლამენტო ურთიერთობების განვითარების მნიშვნელობას. მხარეებმა დადებითად შეაფასეს 2012 წელს იაპონიის საკანონმდელო ორგანოში საქართველო-იაპონიის საპარლამენტო ლიგის ჩამოყალიბება, რომელიც ხელს შეუწყობს საპარლამენტო დონეზე ურთიერთობების გაღრმავებას.
ტეცურო ფუკუიამა შეეხო საქართველოს მიერ ბოლო წლებში განხორციელებულ რეფორმებს, ამასთან, აღნიშნა საქართველოში ბიზნესის გარემოს მიმზიდველობა და ხაზი გაუსვა მსოფლიოში ბიზნესის კეთების სიმარტივის კუთხით საქართველოს მიერ დაკავებულ მეტად საპატიო, მე-16 პოზიციას.
იაპონიის პარლამენტის ზედა პალატის საგარეო ურთიერთობათა და თავდაცვის კომიტეტის თავმჯდომარემ ასევე აღნიშნა სუამ-იაპონიის თანამშრომლობის ფორმატის მნიშვნელობა და იმედი გამოთქვა, რომ ამ ფორმატში იაპონიის და სუამ-ის ქვეყნებს შორის ურთიერთობა შემდგომში გაღრმავდება.
გრიგოლ ვაშაძემ თხოვნით მიმართა ტეცურო ფუკუიამას, რათა იაპონიის პარლამენტმა საქართველოში 2012 წლის ოქტომბერში დაგეგმილ საპარლამენტო არჩევნებზე დამკვირვებლების მისია გამოაგზავნოს, რაც ხელს შეუწყობს გამჭვირვალე და საერთაშორისო სტანდარტების შესაბამისი არჩევნების ჩატარებას.
