"ეკოლოგიური სამართლის ცენტრი'' გარემოზე ზემოქმედების ნებართვის გარეშე მომუშავე ზესტაფონის ფეროშენადნობთა ქარხნის გაჩერებას ითხოვს. ორი თვის წინ "ეკოლოგიური სამართლის ცენტრმა'' ზესტაფონის ფეროშენადნობთა ქარხნის მიერ ჰაერში მავნე ნივთიერებების გაფრქვევასთან დაკავშირებით მასალები შემდგომი რეაგირებისათვის გარემოს დაცვის სამინისტროში, ენერგეტიკის და ბუნებრივი რესურსების სამინისტროში და მთავარ პროკურატურაში გადააგზავნა. როგორც გარემოს დაცვის სამინისტროდან გახდა ცნობილი, ფეროშენადნობთა ქარხანა 10 000 ლარით იქნება დაჯარიმებული.
"ეკოლოგიური სამართლის ცენტრის'' თავმჯდომარის ნიკოლოზ მჟავანაძის განცხადებით, მისმა ორგანიაზაციამ გარემოს დაცვის სამინისტროდან მიიღო წერილი, სადაც აღნიშნულია, რომ გარემოს დაცვის სამინისტროს ეკოლოგიური ექსპერტიზისა და ინსპექტირების დეპარტამენტის მიერ განხორციელდა "ჯორჯიან მანგანეზის'' დათვალიერება შესწავლა, რის შედეგადაც გამოვლინდა, რომ საწარმო ფუნქციონირებდა გარემოზე ზემოქმედების ნებართვის გარეშე. აღნიშნულთან დაკავშირებით, საქართველოს ადმინისტრაციულ სამართალდარღვევათა კოდექსის 791 მუხლის შესაბამისად (რომელიც ითვალისწინებს დაჯარიმებას 10 000 ლარამდე) შედგენილი იქნა ადმინისტრაციულ სამართალდარღვევათა ოქმი და გადაგზავნილ იქნა ზესტაფონის რაიონულ სასამართლოში.
ყოველივე ეს ნიშნავს იმას, რომ ამდენი ხნის განმავლობაში საწარმო მუშაობდა შესაბამისი ნებართვის გარეშე, რაც კიდევ ერთხელ ცხადყოფს იმას, რომ აღნიშნული საწარმოს უკან დგას სახელისუფლებო ინტერესი, ვინაიდან ასე რომ არ იყოს ვერცერთი სხვა საწარმო საქართველოში ვერ იფუნქციონირებდა. „ეკოლოგიური სამართლის ცენტრი" მოითხოვს, დაუყოვნებლივ შეჩერდეს საწარმოს საქმიანობა, ვინაიდან ფეროშენადნობთა ქარხანა საფრთხეს უქმნის მოსახლეობას. ამასთან, სისხლის სამართლის კოდექსის 306-ე მუხლის თანახმად, თუკი საწარმო გააგრძელებს უნებართვოდ საქმიანობას მის ხელმძღვანელებს დაეკისრებათ სისხლის სამართლის პასუხისმგებლობა''.
