დიასპორისა და კავკასიის საკითხთა კომიტეტის თავმჯდომარე ნუგზარ წიკლაური მიიჩნევს, რომ ხიზრი ალდამოვის საქართველოდან წასვლის მიზეზი რუსული პროპაგანდისტული აქციაა.
როგორც მან ჟურნალისტებთან განაცხადა, ალდამოვის წასვლის რეალური მიზეზი არ იცის, თუმცა ყველას კარგად ახსოვს, რუსეთის მხრიდან არაერთხელ გაკეთებული განცხადებები, საქართველოში საიდუმლო სამხედრო ბაზების არსებობისა და ტერორისტების მომზადების შესახებ, რისიც თავადაც არ სჯერათ. შესაბამისად, წიკლაური არ გამორიცხავს, რომ ეს რუსული სპეცსამსახურების მიერ მოწყობილი პროპაგანდისტული აქცია იყოს. თუმცა, მისი თქმით, ალდამოვი არ ფლობს რაიმე ისეთი ტიპის ინფორმაციას, რომელიც ,შესაძლოა, მათ გამოადგეთ.
"მიუხედავად იმისა, რომ დიდი ხანია ვიცნობ, ბოლო სამი წლის განმავლობაში, ის პირადად არც კი მინახავს. თავისი განცხადებით მან პრაქტიკულად უარი თქვა თავის 25 წლის ცხოვრებასა და საზოგადოებრივ მოღვაწეობაზე. როდესაც ადამიანი თავის ცხოვრებაზე ასე ხელაღებით ამბობს უარს, რა თქმა უნდა, ჩნდება ეჭვი, რომ ეს არ არის მისი პიროვნული გადაწყვეტილება და სხვა მოტივაცია არსებობს. ამ მოტივაციას კი ფარდა ახადა მისმა განცხადებამ იმის შესახებ, რომ საქართველოში მხოლოდ იმ შემთხვევაში დაბრუნდება, როდესაც პრეზიდენტი მიხეილ სააკაშვილი აღარ იქნება. ამ განცხადების შემდეგ ყველასთვის ნათელი გახდა, რომ ეს საქართველოს წინააღმდეგ რუსული სპეცსამსახურებისა და მათი ჩეჩნური წარმომადგენლობის მიერ მოწყობილი პროპაგანდისტული აქციაა", - აღნიშნა წიკლაურმა და დასძინა, რომ ასევე არ გამორიცხავს მისი ახლობლების დანიშნების მცდელობას რუსული სპეცსამსახურების მხრიდან.
შეგახსენებთ, რუსული საინფორმაციო საშუალებების მიერ გავრცელებული ინფორმაციით, ხიზრი ალდამოვმა რამზან კადიროვს, ჩეჩენ ხალხს პატიება სთხოვა და პირობა დადო, რომ ამიერიდან მხოლოდ მათი კეთილდღეობისთვის იზრუნებს.