სოფლის მეურნეობის მინისტრმა ზაზა გოროზიამ და ქვემო ქართლის გუბერნატორმა დავით კირკიტაძემ, სოფელ ნახიდურში მცხოვრები ფერმერის - იბრაგიმ იბრაგიმოვიჩის კუთვნილი 5 ჰექტარი მიწის ფართობი დაათვალიერეს. მინისტრი საადრეო კარტოფილის წარმოების პროცესს ადგილზე დაესწრო.
კარტოფილის ახალი ჯიშების გაშენებით, წლევანდელი მოსავალი, მოსავლიანობის თვალსაზრისით გასულ წელთან შედარებით საკმაოდ უხვია.
"წელს საქართველოში კარტოფილის იმპორტის 100 %-ით ჩანაცვლება მოხდა. კარტოფილის მოსავლის სიჭარბემ წელს პირველად გამოიწვია ინვესტორების აქტიური დაინტერესება, რაც კარტოფილის გადამამუშავებელი ქარხნების მშენებლობაში გამოიხატება", - განაცხადა გოროზიამ.
სოფლის მეურნეობის მინისტრი ქვემო ქართლში, სოფელ ნახიდურის მოსახლეობასაც შეხვდა. მინისტრი ადგილობრივ მცირე და საშუალო ფერმერებს სოფლის მეურნეობის სამინისტროს მიერ დანერგილ თანამედროვე ტექნოლოგიებზე ესაუბრა და განხორციელებული პროექტები გააცნო.
