"მეც და რაც ყველაზე მნიშვნელოვანია ქართველი ხალხიც მადლიერია თქვენი მტკიცე პოზიციისა და მხარდაჭერის გამო", - ეს განცხადება საქართველოს პრეზიდენტმა მიხეილ სააკაშვილმა ნატოს გენერალურ მდივანთან ანდერს ფოგ რასმუსენთან ერთად ბრიუსელში გამართულ ერთობლივ პრესკონფერენციაზე გააკეთა.
"როდესაც დანიის პრემიერ-მინისტრი იყავით არასოდეს დაგვავიწყდება 2008 წელს გაკეთებული თქვენი ძლიერი განცხადებები, იქ ფაქტი, რომ თბილისში ჩამოხვედით ომის მომდევნო დღეებში. ასევე ჩემი პირველი ოფიციალური ვიზიტი ომის შემდეგ დანიაში შედგა და არასოდეს დამავიწყდება თქვენი მასპინძლობა",_ განაცხადა მიხეილ სააკაშვილმა.
მისივე თქმით, ნატოს პოზიციას საქართველოსათვის ისტორიული მნიშვნელობა აქვს.
"ახლაც, როდესაც ეფექტურად მუშაობთ და წარმატებით უმკლავდებით ნატოს გენერალური მდივნის საქმეს, ძლიერად უჭერთ მხარს საქართველოს მისწრაფებას ალიანსში, ჩვენს რეფორმებს, ჩვენი ქვეყნის ტერიტორიულ მთლიანობას და ჩვენი რეგიონის სტატუს-კვოს მიუღებლობას. ამას აქვს დიდი ისტორიული მნიშვნელობა გრძელვადიანი პერსპექტივისთვის არა მხოლოდ ჩვენი ქვეყნის არამედ მთელი რეგიონისათვის", _ განაცხადა მიხეილ სააკაშვილმა.