"რესპუბლიკელები" პარტიების ფინანსური მონიტორინგის სამსახურის ხელმძღვანელს, ნათია მოგელაძეს ახსნა-განმარტებას სთხოვენ. "რესპუბლიკელებმა" ნათია მოგელაძის სახელზე შესაგებელი შეიტანეს, რომლის დეტალებზე დღეს "რესპუბლიკური პარტიის" ფოთის ორგანიზაციიის თავმჯდომარემ, გაიოზ ქინქლაძემ პრესკონფერენციაზე ისაუბრა.
"უწყებაში, რომელიც მივიღე, არ არის ნათქვამი, რომელი კანონდარღვევისთვის ვარ მიცემული ადმინისტრაციულ პასუხისგებაში. ასევე არ არის ნათქვამი რისთვის გახდა საჭირო ჩემი გადაუდებლად გამოცხადება კონტროლის პალატაში. ამის მიუხედავად, მზად ვარ, გამოვცხადდე და მოგაწოდოთ ჩემს ხელთ არსებული ნებისმიერი ინფორმაცია. თუმცა, წინასწარ უნდა მაცნობოთ, თუ რა გადაცდომის ან ადმინისტრაციული სამართალდარღვევისთვის შეიძლება ვიყო პასუხისგებაში მიცემული და გადმომცეთ შესაბამისი ოქმი თანდართული მასალით. წინააღმდეგ შემთხვევაში, მე ვერ შევძლებ ვისარგებლო კანონით ჩემთვის მონიჭებული უფლებით", - განაცხადა ქინქლაძემ.
ქინქლაძემ ასევე აღნიშნა, რომ ახსნა-განმარტების მისაცემად გამოცხადების შესახებ უწყება მისი ოჯახის სხვა წევრებმაც მიიღეს.
"ამის მიუხედავად, ისინი არჩევნებამდე მაქსიმალურ სიმშვიდეს შეინარჩუნებენ და საბედისწერო შეცდომებს, როგორც ეს ხელისუფლებას აქვს დაგეგმილი, არ დაუშვებენ", - განაცახდა ქინქლაძემ.