მთავრობის საპარლამენტო მდივანი გია ხუროშვილი აცხადებს, რომ ამ ეტაპზე ფიქსირებული გადასახადები თონებს დაუწესდებათ, ხოლო შემდეგ ეტაპზე უკვე სალონების ჯერიც დადგება.

„გამომდინარე იქედან, რომ საზოგადოების ინტერესი ფიქსირებულ გადასახადთან მიმართებაში საკმაოდ დიდია, ჩვენ ეტაპობრივად შემოვიღებთ ფიქსირებულ გადასახადებს. ამჯერად, საუბარია თონეებზე და თითოეულ თონეზე ფიქსირებული გადასახადის სახით საუბარია, ყოველთვიურად, 100 ლარის გადახდაზე. აღსანიშნავია, რომ თითოეული თვითმართველი ორგანოს წარდგინების საფუძველზე ამ გადასახადის გადახედვაც მოხდება. შესაძლოა აღნიშნული გადასახადი შემცირებული იქნეს 50 %-ით, თუმცა საბოლოო გადაწყვეტილების თვითმართველ ორგანოსთან შეთანხმებით შემოსავლების სამსახური მიიღებს", - განაცხადა გია ხუროშვილმა.

მთავრობის საპარლამენტო მდივანი აცხადებს, რომ ფიქსირებული გადასახადის შემოღებით, ბიზნესს თავისუფლად ოპერირების საშუალება მიეცემა და იდ ბუღალტრული დოკუმენტაციებისა და სალარო აპარატების გამოყენების ვალდებულებისგან თავისუფლდება.

„როგორც კი საწარმოს ბრუნვა 100 ათას ლარს გასცდება ის ხდება დღგ-ს გადამხდელი და შესაბამისად მას უჩნდებოდა ის ვალდებულებები, როგორიც სხვა ჩვეულებრივ საწარმოებს. ამ გადაწყვეტილებით კი მიუხედავად იმისა თუ რამდენი იქნება თონის ბრუნვა, ეს შეიძლება იყოს 100 ათასი ლარიც, 500 ათასი ლარიც და 1 მლნ. ლარიც, ჩვენ ვიღებთ გადაწყვეტილებას, რომ შემოვიღოთ ფიქსირებული გადასახადი, რაც ნიშნავს იმას, რომ ამ თონეების მეპატრონეებს არ ექნებათ არანაირი ვალდებულება დოკუმენტები აწარმოონ, გამოიყენონ სალარო აპარატები, არ ექნება დღგ-ს რეგისტრაციის ვალდებულება და ის ბიზნეს საქმიანობის განხორციელებას თავისუფლად შეძლებს", - აცხადებს გია ხუროშვილი.

შეგახსენებთ, რომ გასულ წელს შემოსავლების სამსახური მცირე მეწარმეებს დაბეგვრის ახალი ფორმის - ფიქსირებული გადასახადის შემოღების ინიციატივით გამოვიდა.
როგორც შემოსავლების სამსახურის უფროსმა ჯაბა ებანოიძემ განმარტა, შემოსავლების სამსახურის ინიციატივით, უახლოეს მომავალში, მცირე მეწარმეებს საშუალება ექნებათ, დაბეგვრის ალტერნატიულ ფორმაზე გადავიდნენ, საუბარია ფიქსირებულ გადასახადზე, რომლის ორი მოდელი ამოქმედდება.

ჯაბა ებანოიძის განმარტებით, ფიქსირებული გადასახადის პირველი მოდელით ის მცირე მეწარმეები ისარგებლებენ, რომლებიც ეწვევიან არა იურიდიული, არამედ ფიზიკური პირების მომსახურებას. მათ არ სჭირდებათ იურიდიული პირებისთვის ხარჯის დამადასტურებელი დოკუმენტისა და ანგარიშფაქტურის გამოწერა. გადასახადის ასეთი ფორმის არჩევის შემთხვევაში ამ კატეგორიის მეწარმეებს მოეხსენებათ სალარო აპარატის გამოყენების აუცილებლობა, საბუღალტრო დოკუმენტაციის წარმოების ვალდებულება და აღარ დაიქირავებენ ბუღალტერს. ისინი დაიბეგრებიან კონკრეტული განაკვეთით თვეში ან კვარტალში. რაც შეეხება განაკვეთებს ამას შემდგომ მთავრობა განსაზღვრას საქმიანობის ტიპისა და ადგილმდებარეობის მიხედვით.

აღსანიშნავია, რომ ალტერნატიული გადასახადის მეორე მოდელი მორგებულია იმ მეწარმეებზე, რომლებიც ეწევიან ვაჭრობას და მათი მომხმარებლები არიან, ასევე ფიზიკური პირები. ამ ტიპის მეწარმეებსაც არ აქვთ შეხება იურიდიულ პირებთან და შესაბამისად არ საჭიროებენ იურიდიული პირებისთვის ხარჯის დამადასტურებელ და სხვა საგადასახადო დოკუმენტაციის გამოწერას. ასეთი კატეგორიის მეწარმეებისთვის იქნება ფიქსირებული გადასახადი ბრუნვის 3%-ის ოდენობით. პირველი მოდელით მოსარგებლე ბიზნესისგან განსხვავებით, მათ ექნებათ სალარო აპარატის გამოყენების ვალდებულება, რადგან 3%-იანი გადასახადის დაანგარიშება მოხდება სალარო აპარატით დაფიქსირებული შემოსავლიდან.

"ფიქსირებული გადასახადის არჩევის შემთხვევაში, ვაჭრობით დაკავებულ მცირე მეწარმეებსაც აღარ მოუწიათ საბუღალტრო დოკუმენტაციის წარმოება, შესაბამისად გათავისუფლდებიან ბუღალტრის დაქირავების ხარჯებისგან. კიდევ ერთი შეღავათი, რომლითაც ორივე კატეგორიის მეწარმეები ისარგებლებენ, ისაა, რომ გაუქმდება 100 000 ლარიანი ზღვარი დღგ-ს გადამხდელად აღრიცხვისთვის. მეწარმეს შეეძლება, რომ იმ შემთხვევაშიც კი, თუ მისმა შემოსავალმა წელიწადში გადააჭარბა 100 000-იან ზღვარს, გააგრძელოს ფიქსირებული გადასახადის გადახდა და არ გახდეს დღგ-ს გადამხდელი"- აღნიშნა ებანოიძემ ბრიფინგზე.

შემოსავლების სამსახურის უფროსი ფიქსირებული გადასახადის შემოღების მიზეზებზე ღიად საუბრობს და განმარტავს, რომ დღეისათვის არსებული რეგულაციით, ბიზნესს ურჩევნია მიკრო ბიზნესის სტატუსით ისარგებლოს, და შემდგომ განვითარებაზე აღარ იზრუნოს, რაც საბოლოო ჯამში ყველა მხარისათვის წამგებიანი ხდება.