დღეს, 19 იანვარს ენერგეტიკისა და ბუნებრივი რესურსების მინისტრი ალექსანდრე ხეთაგური რუსეთის აკადემიური წრეების, სხვადასხვა ტიპის უფლებადაცვითი და მედია ორგანიზაციების წარმომადგენლებს შეხვდება და საქართველოს ენერგოსექტორში განხორციელებულ რეფორმებს გააცნობს.
შეხვედრა ენერგეტიკისა და ბუნებრივი რესურსების სამინისტროში 13:30 საათზე გაიმართება.
მინისტრთან შეხვედრა პროექტის "ქართველ და რუს ახალგაზრდა პროფესიონალთა დიალოგის" ფარგლებში მოეწყობა, რომელსაც "კულტურულ ურთიერთობათა ცენტრი-კავკასიური სახლი" ცნობილი რუსი ჟურნალისტის ოლეგ პანფილოვის ხელმძღვანელობით ახორციელებს.
პროექტის მიზანია, ორმხრივი ურთიერთობების გაძლიერებით, ხელი შეუწყოს ნდობის მშენებლობასა და გრძელვადიან მშვიდობას ქართულ და რუსულ საზოგადოებებს შორის.
აღნიშნული პროექტის ფარგლებში საქართველოში სტუმრად ჩამოსული რუსეთის სამოქალაქო საზოგადოების წარმომადგენლები ქართველ კოლეგებთან ერთად, შეხვედრებს საქართველოს სახელმწიფო სტრუქტურების,არასამთავრობო სექტორის წარმომადგენლებსა და დამოუკიდებელ ექსპერტებთან მართავენ.
პროექტის ბოლოს სამომავლო თანამშრომლობის სტრატეგიის განსაზღვრა და ერთობლივი ბლოგის შექმნა იგეგმება.