გეგმის მიხედვით, ბაქო-თბილისი-ყარსის სარკინიგზო მაგსიტრალი ექსპლუატაციაში 2013 წლის დასაწყისში ან 2012 წლის ბოლოს დასრულდება. აღსანიშნავია, რომ გაძვირდა საქართველოს მონაკვეთის ღირებულება და გარკვეული ფინანსური პრობლემები შეექმნა თურქეთსაც პროექტის რეალიზებისათვის.

გასულ წელს საქართველოსა და აზერბაიჯანს შორის ხელი მოეწერა საკრედიტო ხელშეკრულებას ბაქო-თბილისი-ყარსის სარკინიგზომაგისტრალის პროექტის განსახორციელებლად დამატებით, 575 მლნ აშშ დოლარის გამოყოფის შესახებ.
აღნიშნული თანხა ბაქო-თბილისი ყარსის სარკინიგზო მაგისტრალის პროექტის ფარგლებშიმიმდინარე სამუშაოებს: თეთრიწყარო-ახალქალაქის მონაკვეთის მშენებლობას და რეაბილიტაცია-რეკონსტრუქციას, ახალქალაქის სარკინიგზო სადგურის და შესაბამისი ინფრასტრუქტურული ობიექტების მშენებლობას მოხმარდება.

ბაქო-თბილისი-ყარსის პროექტში ჩართული მხარეები ვარაუდობენ, რომ მაგისტრალის მეშვეობით წელიწადში 1 მლნ. მგზავრს და 6,5 მლნ. ტონა ტვირთს გადაზიდავენ. ბაქო-თბილისი-ყარსის სარკინიგზო ხაზის პროექტის ფარგლებში თურქეთში შენდება სადგური, რომელიც ევროპულ და პოსტსაბჭოთა სტანდარტების სარკინიგზო ხაზებს შეაერთებს.

საქართველოსა და თურქეთში გამავალი სარკინიგზო მაგისტრალის მთლიანი სიგრძე 245 კმ-ია. აქედან 175 კმ საქართველოს ტერიტორიაზე გადის, ხოლო 70 კმ რკინიგზა გაივლის თურქეთის ტერიტორიაზე.

ამ დროისათვის რეაბილიტაცია უტარდება საქართველოს ტერიტორიაზე გამავალი რკინიგზის 150 კმ-იან მონაკვეთს. აღნიშნულ მონაკვეთზე დაგეგმილია 9 სადგურის განახლება. ახალქალაქი-კარწახის 25 კმ-იან მონაკვეთზე იგება სრულიად ახალი სარკინიგზო ხაზი. აღნიშნულ მონაკვეთზე აშენდება 2 ახალი სადგური და 4 ახალი ხიდი.

თურქეთი-საქართველოს საზღვარზე, კარწახში შენდება 4 კმ-იანი დამაკავშირებელი გვირაბი, რომლის ნახევარიც საქართველოს ტერიტორიაზე გაივლის, ნახევარი კი თურქეთის ტერიტორიაზე. ბაქო-თბილისი-ყარსის სარკინიგზო მაგისტრალის პროექტი "ბაქო-თბილისი-ყარსის ახალი სარკინიგზო ხაზის" მშენებლობის შესახებ საქართველოს, აზერბაიჯანისა და თურქეთს შორის გაფორმებული საერთაშორისო შეთანხმების ფარგლებში ხორციელდება და საქართველო-აზერბაიჯანი-თურქეთის, როგორც ინფრატსრუქტურული ასევე რეგიონული მნიშვნელობის თვალსაზრისით უმნიშვნელოვანეს პროექტს წარმოადგენს.