ქართული ღვინის განვითარების მიზნით საკონსულტაციო საბჭომ უკვე ფუნქციონირება დაიწყო. აღნიშნულთან დაკავშირებით სოფლის მეურნების მინისტრმა ზაზა გოროზიამ ბრძანებას ხელი უკვე მოაწერა.
ქართული ღვინის განვითარების მიზნით შექმნილი საკონსულტაციო საბჭოს ძირითადი ფუნქციები და ამოცანებია: მეღვინეობის დარგში განხორციელებული, მიმდინარე და დაგეგმილი პროექტების შესახებ ინფორმაციის მოპოვება და ანალიზი; პროექტების შედეგების პროგნოზირება და შესაბამის ღონისძიებათა თაობაზე წინადადებების მომზადება; კომპეტენციის სფეროში სამართლებრივი აქტების პროექტების შემუშავების მიზნით რეკომენდაციების მომზადება; მეღვინეობის დარგის განვითარების მიზნით, ყურძნისეული წარმოშობის პროდუქტების აღრიცხვის, ხარისხის კონტროლისა და მარკეტინგული მიმართულებების განსაზღვრისათვის წინადადებებისა და რეკომენდაციების მომზადება; მეღვინეობის დარგში დასაქმებული იურიდიული და ფიზიკური პირების მიერ წარმოდგენილი წინადადებების განხილვა და რეკომენდაციების მომზადება მათ მიერ წარმოდგენილი წინადადებების გაზიარების მიზანშეწონილობის თაობაზე და მიღებული რეკომენდაციების საქართველოს სოფლის მეურნეობის მინისტრისათვის წარდგენა.
საკონსულტაციო საბჭოს სოფლის მეურნეობის მინისტრი ხელმძღვანელობს.
აღსანიშნავია, რომ საჭიროების შემთხვევაში საბჭოს მუშაობაში მონაწილეობის მისაღებად საბჭოს თავმჯდომარის გადაწყვეტილებით, სათათბირო ხმის უფლებით შეიძლება მოწვეულ იქნენ პირები, რომლებიც არ შედიან საბჭოს შემადგენლობაში.
ამასთან, საბჭო იკრიბება თავმჯდომარის ან საბჭოს წევრთა ერთი მესამედის მოთხოვნის საფუძველზე და მასში შემავალ თითოეულ წევრს ერთი ხმის უფლება აქვს.
რაც შეეხება საბჭოს საქმიანობის შეწყვეტას, გადაწყვეტილებას საქართველოს სოფლის მეურნეობის მინისტრი იღებს.
