"ნავთობპროდუქტების იმპორტიორთა კავშირი" სექტორის 2011 წლის შედეგებს აჯამებს. ,,ნავთობპროდუქტების იმპორტიორთა კავშირის" თავმჯდომარის ვანო მთვრალაშვილის განმარტებით, 2011 წელი კომპანიების მიერ განხორციელებული ინვესტიციებითაც მნიშვნელოვანი წელი იყო. ბაზრის ორმა მსხვილმა მოთამაშემ 2011 წელს გორის ჩქაროსნულ მაგისტრალზე მულტიფუნქციური კომპლექსები ააშენეს.
"პირველ რიგში აქედან უნდა აღინიშნოს კომპანიების ,,სოკარისა" და ,,ვისოლის" მიერ გორის ჩქაროსნულ მაგისტრალზე მულტიფუნქციური კომპლექსების აშენება. აღნიშნული კომპლექსები პირველია არა მხოლოდ საქართველოში, არამედ მთლიანად ამიერკავკასიის რეგიონში. თავიანთი ინფრასტრუქტურითა და დიზაინით არ ჩამოუვარდებიან ევროპის წამყვან ქვეყნებში არსებულ მსგავს კომპლექსებს. პარალელურად ამისა, განხორციელდა ახალი თანამედროვე ინფრასტუქტურის ავტოგასამართი სადგურების მშენებლობა, რომლებიც აკმაყოფილებენ ევრო სტანდარტის ყველა პარამეტრს (ეს არის გარემოს დაცვითი მოთხოვნები, ჩასხმის სიზუსტე, სანიტარულ-ჰიგიენური კვანძები და სხვ). ამ სფეროში ზემოხსენებულ კომპანიებთან ერთად მნიშვნელოვანი ინვესტიციები განახორციელეს ასევე კომპანიებმა ,,ლუკოილ ჯორჯია", ,,რომპეტროლ საქართველო" და ,,გალფ ჯორჯია".- განაცხადა ვანო მთვრალაშვილმა.
მთვრალაშვილის თქმით, მიმდინარე წელს ბაზარზე ოპერირება დაიწყო მსოფლიოში ცნობილმა ისეთმა ბრენდმა კომპანიამ, როგორიცაა ,,გალფი", რომელიც საკმაოდ დინამიურად ავითარებს თავის ქსელს. შესაბამისად, ხელს უწყობს ბაზარზე კონკურენციის ზრდას. ეს მეტად მნიშვნელოვანია მომხმარებლისთვის, რადგან აქ საუბარია არა მხოლოდ პროდუქციის ფასებზე, ასევე მომსახურების თანამედროვე სერვისების დანერგვაზე.
" ყველა კომპანია ქმნის მომხმარებლისთვის საკუთარ პროდუქტს, ე.წ. დაგროვებით ბარათებს, რომლებიც საშუალებას აძლევს მომხმარებელს რეალური ფასდაკლებით მიიღოს ესა თუ ის პროდუქტი. წელს მსოფლიოში ნავთობსა და ნავთობპროდუქტებზე არსებულმა მაღალმა ფასებმა განაპირობა ის, რომ საქართველოშიც ფიქსირებოდა მთელი წლის განმავლობაში საწვავზე საკმაოდ მაღალი ფასები. მიუხედავად ამისა არ შემცირებულა ნავთობპროდუქტების მოხმარება. შესაბამისად, მთელი ბიზნეს-სექტორიდან სახელმწიფო ბიუჯეტში შესული თანხა არ იქნება გასული წლის მაჩვენებელზე ნაკლები"- აცხადებს მთვრალაშვილი.
უნდა აღინიშნოს ასევე, რომ მომავალი წლიდან ძალაში შედის საწვავზე ახალი სტანდარტი, რომლის მიხედვითაც მნიშვნელოვნად იქნება გაუმჯობესებული რეალიზებულ საწვავის ხარისხობრივ-ეკონომიკური მაჩვენებლები. მთლიანობაში საქართველოში რეალიზაციაში არის როგორც ევრო 5-ის, ასევე ევრო 4-ისა და ევრო 2-ის სტანდარტის საწვავი. რეალიზებული საწვავის ხარისხთან დაკავშირებით შეიძლება ითქვას, რომ საქართველოში ერთ-ერთი საუკეთესო მდგომარეობაა პოსტსაბჭოთა სივრცეში.
აქვე უნდა აღვნიშნოთ, რომ დღეისათვის საქართველოს ნავთობპროდუქტების ბაზარზე ფაქტიურად არ არსებობს აღურიცხავი და კონტრაბანდული საწვავი, რომელიც მნიშვნელოვან ზიანს აყენებდა როგორც სახელმწიფო ბიუჯეტს, ასევე კომპანიებს. ეს არის საქართველოს აღმასრულებელი ხელისუფლების დამსახურება, რომელმაც ძირფესვიანად აღმოფხვრა კონტრაბანდა. შეიძლება ითქვას, რომ ამ მაჩვენებლით საქართველო ერთი-ერთი საუკეთესოა.
