სასტუმრო "თბილისი მარიოტში" "ოპერის მეგობართა ფონდის" პრეზენტაცია გაიმართა, სადაც ცნობილი გახდა, რომ ფონდს თბილისის მერი გიგი უგულავა უხელმძღვანელებს. ფონდის ერთ-ერთი დამფუძნებელია თავდაცვის ყოფილი მინისტრი დავით კეზერაშვილი. ფონდის დაფუძნების დოკუმენტს ხელი მოაწერეს დავით კეზერაშვილმა და ოპერის თეატრის სამხატვრო ხელმძღვანელმა, დავით საყვარელიძემ.
როგორც უგულავამ აღნიშნა, მიესალმება ყველა ბიზნესმენს, რომელიც ოპერის საკეთილდღეოდ რამეს აკეთებს. მისი თქმით, "ოპერის მეგობართა ფონდში" პოლიტიკოსი ვერ მოხვდება, თუ ვინმეს რაიმე საქმის გაკეთება უნდა, აღნიშნულ ფონდში როგორც ბიზნესმენი, ისე შეძლებს თავისი კეთილი საქმეების განხორციელებას.
კეზერაშვილის განცხადებით, თავდაცვის სამინისტრო მისთვის წარსულია და, როგორც ბიზნესმენი, ბევრს გააკეთებს ქართული ოპერის თანადგომისთვის.
"ოპერის მეგობართა ფონდის" პრეზენტაციას ხელოვანები და დიპლომატიური კორპუსის წარმომადგენლები ესწრებოდნენ.
პრეზენტაციაზე "ქართუ ჯგუფის" წარმომადგენლები არ იმყოფებოდნენ. ეს ჯგუფი ოპერის თეატრის შენობას არემონტებს. დედაქალაქის მერმა ამასთან დაკავშირებითაც ისაუბრა: "ერთ უხერხულობას მოგიხსნით, ვიცი აქ შეკითხვები იყო. მე ვერანაირ პრობლემას ვერ ვხედავ, ამას ვაცხადებ, როგორც მერი, რომ ნებისმიერი ფონდი არემონტებდეს ოპერას. ამ შემთხვევაში "ქართუს" ვგულისხმობ და რატომ არ არის, პასუხიც მარტივია - მე აქ ერთადერთი პოლიტიკოსი ვარ, რადგან პოლიტიკოსები არ აკეთებენ კონტრიბუციას, ამ შემთხვევში კონტრიბუციას აკეთებენ ბიზნესმენები. მე, პოლიტიკოსი, აქ ვარ იმიტომ, რომ ვარ მერი. საერთაშორისო ტრადიციის თანახმად, არა რომელიმე კონკრეტული პიროვნება, არამედ მერია თავმჯდომარე. დანარჩენ შემთხვევაში, ეს არის კერძო პირების და ბიზნესმენების საქმე. ვინც გადაწყვეტს, რომ პოლიტიკაში იყოს, შესაბამისად, ამ საქმეს, როგორც ბიზნესმენი ვეღარ გააგრძელებს. სხვა მხრივ მე ვერანაირ პრობლემას ვერ ვხედავ, რომ მადლობა გადავუხადოთ ნებისმიერ ადამიანს, ვინც აფინასებს სხვადასხვა ძეგლს, ამ შემთხვევაში ოპერას ვგულისხმობ. აი, ეს უხერხულობა მოგიხსენით. მაგრამ როცა პოლიტიკოსი ხარ, ხელები შეკრული გაქვს", - აღნიშნა უგულავამ.
