ე.წ. სამხრეთ ოსეთის "პრეზიდენტობის" კანდიდატის ალა ჯიოევას ნდობით აღჭურვილმა პირი ანატოლი ბარანკევიჩი აცხადებს, რომ ალა ჯიოევა და მისი მომხრეები საქართველოსთან საუბარს მანამ არ დაიწყებენ ვიდრე საქართველო ე.წ. სამხრეთ ოსეთის დამოუკიდებლობას არ აღიარებს და ე.წ. ჩადენილ გენოციდს არ მოინანიებს.
"პირველი - საქართველოს უნდა აღიაროს სამხრეთ ოსეთის დამოუკიდებლობა და მან ასევე უნდა მოინანიოს ოსი ხალხის მიმართ განხორციელებული გენოციდი. საქართველოსთან საუბარი მხოლოდ ამის შემდეგ დაიწყება", _ განაცხადა ბარანკევიჩმა ცხინვალში მიტინგზე გამოსვლისას.
მან კიდევ ერთხელ გაიმეორა, რომ ეს ორი ის აუცილებელი პირობაა, რომლის შესრულების შემდეგაც საქართველოსთან დიალოგი დაიწყება.
"ურთიერთობები უნდა გვქონდეს, მაგალითაც ეკონომიკური, ეს საქართველოსთვისაც და სამხრეთ ოსეთისთვისაც სასარგებლო იქნება. მაგრამ ეს მხოლოდ მას შემდეგ განხორციელდება რაც საქართველო ჩვენს დამოუკიდებლობას აღიარებს და ჩვენს მიმართ განხორციელებულ გენოციდს მოინანიებს", _ განაცხადა ბარანკევიჩმა.
