აჭარის მთავრობის მეთაურმა დღეს ბათუმის ტერიტორიაზე მშენებარე სასტუმროები დაათვალიერა. ლევან ვარშალომიძე Holiday inn-ის მშენებლობას გაეცნო, რომელიც 200 ნომერზეა გათვლილი.
Holiday inn-ის ბათუმში "აჭარა ჯგუფი" აშენებს, რომელიც Holiday inn-ს თბილისში უკვე ფლობს. ხუთვარსკვლავიანი სასტუმროს მშენებლობა მიმდინარე წლის ზაფხულში დაიწყო და პირველ სტუმრებს ბათუმის Holiday inn 2013 წლის გაზაფხულზე მიიღებს.
გოგებაშვილის ქ. #10-ში მდებარე ყოფილი შინაგან საქმეთა სამინისტროს შენობა პირობებიან აუქციონზე 2009 წელს "არაი ჯორჯიამ" შეიძინა, რაშიც "არაი ჯორჯიამ" 2,5 მლნ. დოლარი გადაიხადა. ამის შემდეგ კი "არაი ჯორჯიამ" პირობების შესრულება ვეღარ მოახერხა და საკუთარი აქტივი "აჭარა ჯგუფს" მიყიდა. როგორც ცნობილია Holiday inn ბათუმში "აჭარა ჯგუფი" დაახლოებით 25 მლნ. დოლარის ინვესტირებას გეგმავს.
Holiday inn -ის შემდეგ ლევარ ვარშალომიძე 30-ნომრიან ბუტიკის ტიპის სასტუმროს მშენებლობასაც გაეცნო, რომელიც მელაშვილის ქუჩაზე მდებარეობს, ექსპლუატაციაში 2012 წლის აპრილში შევა. ვარშალომიძის თქმით, ამ ეტაპზე ბათუმში არსებული სასტუმროები 9600 საწოლზეა გათვლილი, რასაც მალე კიდევ 4000, მოგვიანებით კი 6000 დაემატება.
