შრომის საერთაშორისო ორგანიზაციის ფინანსური მხარდაჭერით, საქართველოში მოქმედი კომპანიები ხელმოწერით შეუერთდნენ გასულ წელს ბიზნეს გაერთიანებების მიერ მიღებულ აქტს _ "ბიზნესის მიერ ტრეფიკინგის წინააღმდეგ ქცევის კოდექსი", რომელიც დაეხმარება დამსაქმებელს უფრო ეფექტურად იბრძოლოს ტრეფიკინგის, იძულებითი შრომის წინააღმდეგ და ამით უფრო მეტად შეუწყოს ხელი ღირსეული შრომის პირობების შექმნას ქვეყანაში.
ბიზნეს გაერთიანებები და საქართველოში მოღვაწე კომპანიები ითვალისწინებენ მსოფლიოს განვითარებული საზოგადოების გამოცდილებას და რეკომენდაციებს, ასევე მხედველობაში იღებენ იძულებითი შრომის წინააღმდეგ ბრძოლის აუცილებლობას და მისი განხორციელების გარდაუვალობას. ისინი გამოდიან ინიციატივით და სურთ ერთიანი ძალისხმევით იძულებითი შრომის და ტრეფიკინგის წინააღმდეგ ქცევის კოდექსზე ხელმოწერით გააჟღერონ საკუთარი ნება იძულებითი შრომის, ადამიანით ვაჭრობისა და ექსპლუატაციის ამა თუ იმ ფორმის გამოყენების წინააღმდეგ.
ქცევის კოდექსით განსაზღვრული პრინციპები შედგენილია საქართველოს კანონმდებლობის, შრომის საერთაშორისო ორგანიზაციის კონვენციებისა და რეკომენდაციების, შრომის საერთაშორისო ორგანიზაციის ექსპერტთა კომიტეტის კომენტარების, აგრეთვე შრომის საერთაშორისო ორგანიზაციის ისეთი ინსტრუმენტების საფუძველზე, როგორიცაა, `სამუშაო ადგილზე ფუნდამენტური პრინციპებისა და უფლებების დეკლარაცია", ასევე გაერო-ს ტრანსნაციონალური ორგანიზებული დანაშაულის წინააღმდეგ კონვენციის დამატებითი ოქმი ~ადამიანების, განსაკუთრებით ქალებისა და ბავშვების ტრეფიკინგის თავიდან აცილების, აღკვეთისა და დასჯის შესახებ".
აღსანიშნავია, რომ იძულებითი შრომის და ტრეფიკინგის წინააღმდეგ ქცევის კოდექსი არ წარმოადგენს ეროვნული კანონმდებლობისა და რეგულაციების შემცვლელს. ეს არის ნებაყოფლობითი ინსტრუმენტი, რომელიც ცდილობს ხელი შეუწყოს დამატებით კერძო ინიციატივებსა და კანონთან შესაბამისობას. კოდექსი არის პრევენცია დამსაქმებლებისათვის, რათა მათ შეასრულონ ეფექტური როლი იძულებითი შრომისა და ტრეფიკინგის წინააღმდეგ მათი შესაძლებლობების ფარგლებში.
