ვიცე პრემიერ-მინისტრმა გიორგი ბარამიძემ ბრიუსელში სამუშაო ვიზიტის ფარგლებში მორიგი შეხვედრა ევროკომისართან ევროკავშირის გაფართოვებისა და სამეზობლო პოლიტიკის საკითხებში შტეფან ფულესთან გამართა.
შეხვედრაზე ყურადღება გამახვილდა ევროპარლამენტის მიერ ა.წ. 17 ნოემბერს მიღებული საქართველოს მხარდამჭერი რეზოლუციის მნიშვნელობაზე, რომელშიც ევროპარლამენტი ევროკავშირის საბჭოს, ევროკომისიასა და საგარეო ქმედებათა სამსახურს მოუწოდებს აღიარონ რუსეთის მიერ საქართველოს ტერიტორიების ოკუპაცია და ამ ტერიტორიებზე წარმოებული ეთნიკური წმენდა. ასევე აღინიშნა რუსეთ საქართველოს კონფლიქტის მშვიდობიან მოგვარებასთან დაკავშირებით ევროკავშირის გააქტიურების დიდი მნიშვნელობა. ხაზი გაესვა საქართველოში ევროკავშირის მონიტორინგის მისიის (EUMM) განსაკუთრებულ როლს მშვიდობისა და სტაბილურობის შენარჩუნებაში.
შეხვედრაზე განსაკუთრებული ყურადღება დაეთმო ქვეყნის ევროპული ინტეგრაციის აქტუალურ საკითხებს. ხაზი გაესვა მიმდინარე წლის დეკემბერში ღრმა და ყოვლისმომცველი თავისუფალი ვაჭრობის შესახებ შეთანხმებაზე მოლაპარაკებების დაწყებისა და ასევე უმოკლეს დროში უვიზო მიმოსვლის სამოქმედო გეგმის შემუშავების მიზნით დიალოგის დაწყების მნიშვნელობას. განხილულ იქნა აღმოსავლეთ პარტნიორობის ფარგლებში თანამშრომლობის შემდგომი განვითარებისა და პოლიტიკური დიალოგის გაღრმავების პერსპექტივები. აღინიშნა ამ მხრივ საქართველოს განსაკუთრებული როლი და შესაძლებლობები.
შეხვედრაზე, ასევე, განიხილეს საქართველოში მიმდინარე დემოკრატიული რეფორმები და საარჩევნო გარემოს შემდგომი გაუმჯობესებისაკენ უკვე გადადგმული და მომავალში განსახორციელებელი ნაბიჯები.
ვიზიტის ფარგლებში გიორგი ბარამიძე, ასევე, შეხვდა ევროკავშირთან ლიტვის, ლატვიის, რუმინეთის, ბულგარეთის, პოლონეთისა და ავსტრიის მუდმივ წარმომადგენლებს. განხილული იქნა რუსეთ-საქართველოს კონფლიქტის მშვიდობიანი გზით მოგვარებასთან დაკავშირებული საკითხები. ხაზი გაესვა საქართველოს ტერიტორიების რუსეთის მიერ ოკუპაციისა და ეთნიკური წმენდის აღიარების მნიშვნელობას.
შეხვედრაზე, ასევე იმსჯელეს საქართველოში მიმდინარე რეფორმებსა და ქვეყნის მიერ ეკონომიკური და დემოკრატიული განვითარების მხრივ მიღწეული წარმატებებზე. აღინიშნა ევროპული ინტეგრაციის მხრივ არსებული მიღწევები და მომავალი ნაბიჯები, მათ შორის ღრმა და ყოვლისმომცველი თავისუფალი ვაჭრობისა და უვიზო მიმოსვლის დროულად დამყარების აუცილებლობა. ევროკავშირთან წევრი ქვეყნების მუდმივმა ელჩებმა გამოთქვეს ყველა ზემოთხსენებულ საკითხებზე საქართველოს აქტიურად მხარდაჭერის მზაობა.
