რუსეთთან დიპლომატიური ურთიერთობის გაწყვეტის მთავარი მიზეზი მისი მხრიდან საქართველოს განუყოფელი ტერიტორიების დამოუკიდებელ სახელმწიფოებად აღიარებაა. ასე უპასუხა საქართველოს საგარეო საქმეთა მინისტრის პირველმა მოადგილე ნიკოლოზ ვაშაკიძემ ჟურნალისტის კითხვას, თუ "როგორ შეაფასებდა, ბიძინა ივანიშვილის განცხადებას რუსეთთან ურთიერთობების აღდგენასთან დაკავშირებით, მაშინ როდესაც ორ ქვეყანას შორის დიპლომატიური ურთიერთობები გაწყვეტილია".
"მოგეხსენებათ, დიპლომატიური ურთიერთობა რუსეთთან გაწყდა მას შემდეგ, რაც მან ცნო დამოუკიდებელ სახელმწიფოებად საქართველოს განუყოფელი ტერიტორიები. ეს გახდა მთავარი მიზეზი დიპლომატიური ურთიერთობის გაწყვეტის", - განაცხადა ვაშაკიძემ.
ბიძინა ივანიშვილი თავისი პოლიტიკური დღის წესრიგის საკითხად რუსეთთან დიალოგის აღდგენას ასახელებს. განცხადება ამის შესახებ ივანიშვილმა "როიტერისათვის მიცემულ ინტერვიუში გააკეთა.
"შესაძლოა ჩვენ რუსეთთან ერთად ინტერესების თანხვედრასაც მივაღწიოთ იმ შემთხვევაში თუ სწორ ნაბიჯებს გადავდგამთ", _ აცხადებს ივანიშვილი.
შეგახსნებთ, რომ ბიძინა ივანიშვილმა, რომლის ქონებაც 5,5 მილიარდ აშშ დოლარია, საქართველოს პოლიტიკურ ცხოვრებაში აქტიური მონაწილეობის მიღების სურვილი უკვე გამოთქვა. ივანიშვილი პოლიტიკური პარტიის ჩამოყალიბებას და საპარლამენტო არჩევნებში მონაწილეობის მიღებას გეგმავს. ბიძინა ივანიშვილი საქართველოს პრეზიდენტს მიხეილ სააკაშვილს გადადგომისკენ მოუწოდებს.
