ბიძინა ივანიშვილი მიიჩნევს, რომ იგი შეძლებს კომპრომისის გამოძებმას და საქართველოსათვის ისეთი როლის გამონახვას, რომელიც მოსახერხებელი იქნება აშშ-სთვისაც, ევროპისთვისაც და რუსეთისთვისაც. ეს განცხადება ბიძინა ივანიშვილმა "როიტერთან" საუბარში გააკეთა.
მანვე აღნიშნა, რომ უახლოეს წლებში მსოფლიოს კვლავ ვლადიმერ პუტინთან ექნება საქმე.
"რუსეთის საზოგადოებას, რუს ხალხს მოსწონს ეს ადამიანი. ეს მათი საქმეა, მათი არჩევანია, თუმცა უფრო დემოკრატიული რუსეთი, ალბათ, უფრო საინტერესო იქნებოდა ევროპისა და აშშ-სთვის", _ აცხადებს ბიძინა ივანიშვილი.
შეგახსნებთ, რომ ბიძინა ივანიშვილმა, რომლის ქონებაც 5,5 მილიარდ აშშ დოლარია, საქართველოს პოლიტიკურ ცხოვრებაში აქტიური მონაწილეობის მიღების სურვილი უკვე გამოთქვა. ივანიშვილი პოლიტიკური პარტიის ჩამოყალიბებას და საპარლამენტო არჩევნებში მონაწილეობის მიღებას გეგმავს. ბიძინა ივანიშვილი საქართველოს პრეზიდენტს მიხეილ სააკაშვილს გადადგომისკენ მოუწოდებს და პოლიტიკურ პარტიებთან ამჟამად კონსულტაციებს მართავს.