მილიარდერი ბიძინა ივანიშვილი აცხადებს, რომ რუსეთის ფედერაციაში არსებული მისი ქონების შეფასების პროცესი უკვე დაწყებულია. ეს განცხადება მან "როიტერისათვის" მიცემულ ინტერვიუში გააკეთა.
"რუსეთში არსებული ჩემი ქონების შეფასების პროცესი უკვე დაწყებულია. მე კარგად მესმის, რომ ყველაფერ ამას მაქსიმალურ ფასად ვერ გავყიდი, მაგრამ მზად ვარ ყველაფრის რეალიზება მოვახდინო", _ განაცხადა ივანიშვილმა.
ინტერვიუში ასევე აღნიშნულია, რომ ივანიშვილის თბილისის ოფისის ერთ-ერთი დარბაზის კედლები დემიენ ჰერსტისა და როი ლიხტენშტაინის სურათებითაა შემკული, ეზოში კი ზაჰ ჰადიდის, ანიშა კაპურისა და ჰენრი მურის სკულპტურები დგას.
შეგახსნებთ, რომ ბიძინა ივანიშვილმა, რომლის ქონებაც 5,5 მილიარდ აშშ დოლარია, საქართველოს პოლიტიკურ ცხოვრებაში აქტიური მონაწილეობის მიღების სურვილი უკვე გამოთქვა. ივანიშვილი პოლიტიკური პარტიის ჩამოყალიბებას და საპარლამენტო არჩევნებში მონაწილეობის მიღებას გეგმავს. ბიძინა ივანიშვილი საქართველოს პრეზიდენტს მიხეილ სააკაშვილს გადადგომისკენ მოუწოდებს და პოლიტიკურ პარტიებთან ამჟამად კონსულტაციებს მართავს.
