საქართველოს საგარეო საქმეთა მინისტრის პირველმა მოადგილე ნიკოლოზ ვაშაკიძემ დღეს გამართულ ტრადიციულ ბრიფინგზე ისაუბრა ატლანტიკური საბჭოს ანგარიშზე, რომელიც საქართველოს ეხებოდა. ვაშაკიძის თქმით, ამ ანგარიშში ნათქვამია, რომ ევროპამ და აშშ-მა უნდა გამოიჩინონ მეტი ძალისხმევა საქართველოს მხარდასაჭერად.
"13 ოქტომბერს ამერიკის შეერთებული შტატების ატლანტიკური საბჭოს ფარგლებში არსებული საქართველოს საკითხზე მომუშავე სპეციალურმა სამუშაო ჯგუფმა, რომელსაც თანათავჯდომარეობენ ჯიმ შაჰინი და ლინდსი გრევი გამოაქვეყნეს ანგარიში საქართველოს შესახებ. ანგარიშში ნათქვამია, რომ რუსეთის მიერ აფხაზეთისა და სამხრეთ ოსეთის ოკუპაციით გამოწვეული მზარდი საგარეო ზეწოლისა და ქვეყანაში 2012-13 წლებში დაგეგმილი არჩევნების გათვალისწინებით, ევროპამ და აშშ-მა უნდა გამოიჩინონ მეტი ძალისხმევა საქართველოს მხარდასაჭერად და ქვეყანაში მიმდინარე დემოკრატიული პროცესების გასაღრმავებლად, მათ შორის 2012 წელს ჩიკაგოში დაგეგმილ ნატო-ს სამიტზე.", - განაცხადა ვაშაკიძემ.
საპარლამენტო და საპრეზიდენტო არჩევნები საქართველოს დემოკრატიისთვის ტესტი იქნება. ამის შესახებ ატლანტიკური საბჭოს განცხადებაშია ნათქვამი, რომელიც გასულ კვირას გამოქვეყნდა.
"საქართველომ უნდა გააგრძელოს დემოკრატიის განვითარებისკენ სწრაფვა, ხოლო აშშ-მ და ევროკავშირმა საქართველოს მიმართ მხარდაჭერა გააორმაგონ, მათ შორის 2012 წელს დაგეგმილ ნატო-ს ჩიკაგოს სამიტზე", - აღნიშნულია ანგარიშში.
ანგარიში რეკომენდაციებს სთავაზობს დასავლეთს, ნატოსა და ევროკავშირისკენ საქართველოს სწრაფვის სტიმულირებისთვის.
"მათ შორისაა: გააგრძელონ საქართველოში დემოკრატიის მხარდაჭერა, გახადონ რუსეთი პასუხისმგებელი საქართველოს ოკუპაციაზე და დაიცვან ქვეყნის ტერიტორიული მთლიანობა. აქ ერთ-ერთი შეთავაზებაა ნეიტრალური საერთაშორისო უსაფრთხოების ძალების განთავსება აფხაზეთსა და ცხინვალის რეგიონში. რეკომენდაციებს შორისაა საქართველოს მხარდაჭერაც მსოფლიო სავაჭრო ორგანიზაციაში", - აღნიშნულია ანგარიშში.