29 ოქტომბერს, 10:00 საათზე, გოეთეს ინსტიტუტის სააქტო დარბაზში საერთაშორისო კონფერენცია "ფიგურა და ორნამენტი" საზეიმოდ გაიხსნება.
კონფერენცია ეძღვნება ფიგურისა და ორნამენტის სხვადასხვა მიმართებას კავკასიის ხელოვნებაში ადრექრისტიანული ხანიდან მეჩვიდმეტე საუკუნემდე. მასში მონაწილეობს 10 მეცნიერი საქართველოდან და 19 მეცნიერი ევროპის სხვადასხვა ქვეყნიდან.
კონფერენცია იკვლევს კულტურულ ურთიერთგაცვლას ქვეყნებსა და რეგიონებს შორის. ასევე, მიზნად ისახავს განსაზღვროს კავკასიის სხვადასხვა ვიზუალური კულტურის თავისებურებები და ერთმანეთს შეადაროს მათი ესთეტიკა ფიგურასთან და ორნამენტთან მიმართებაში.
კონფერენციის ერთ-ერთი არსებითი შედეგი იქნება ზოგადად კავკასიის და კერძოდ საქართველოს თემატიკის წინ წამოწევა საერთაშორისო სახელოვნებათმცოდნეო და მონათესავე დარგების კვლევებში. ეს შეუწყობს მკვლევართა უფრო ფართო წრის დაინტერესებას შუა საუკუნეების ქართული ხელოვნებით და მის პოპულარიზაციას.
კონფერენციის თანაორგანიზატორები არიან გ. ჩუბინაშვილის სახელობის ქართული ხელოვნების ისტორიისა და ძეგლთა დაცვის კვლევის ეროვნული ცენტრი, ფლორენციის მაქს პლანკის ხელოვნების ისტორიის ინსტიტუტი და ბაზელის უნივერსიტეტი. კონფერენცია იმართება შოთა რუსთაველის ეროვნული სამეცნიერო ფონდისა და ბაზელის ნებაყოფლობითი აკადემიური საზოგადობის ფინანსური მხარდაჭერით.
