"ფიქრობენ რომ საერთოდ წავალ საქართველოდან, მაგრამ ეს ჩემი სამშობლოა და მე შევიცვალე აზრი. რაც შემრჩა ამ თეატრიდან, ეს არის ჩემი მეგობრების და დასის სიყვარული და მე დავუჯერებ მათ", - განაცხადა რეჟისორმა რობერტ სტურუამ, სპექტაკლის "ნადირობის სეზონის" საპრემიერო ჩვენების შემდეგ.
როგორც "ჯი-ეიჩ-ენს" რუსთაველის თეატრში აცნობეს, რეჟისორსა და თეატრის ხელმძღვანელს ზაალ ჩიქობავაშ შორის მოლაპარაკება ჯერ არ შემდგარა.
"დღეს ორშაბათია, თეატრი დღეს ოფიციალურად ისვენებს. ამიტომ მგონია, რომ ამ თემაზე დღეს საუბარი არ შედგება. ზუსტი პასუხი თეატრში დარჩენასთან დაკავშირებით სტურუას არ გაუკეთებია. მან სცენიდან მხოლოდ საქართველოდან არ წასვლის და მეგობრების სიყვარულის შესახებ ისაუბრა", - განუცხადა "ჯი-ეიჩ-ენს" რუსთაველის თეატრის საზოგადოებასთან ურთიერთობის დეპატრამენტის წარმომადგენელმა, ელენე კვირცხალიამ.
შეგახსენებთ, რომ რობერტ სტურუა შოთა რუსთაველის სახელობის სახელმწიფო დრამატული თეატრის სამხატვრო ხელმძღვანელის თანამდებობიდან კულტურის და ძეგლთა დაცვის მინისტრის 9 აგვისტოს გამოცემულ ბრძანების შედეგად გაათავისუფლეს.
