საქართველოს საგარეო საქმეთა სამინისტრო საქართველო-აზერბაიჯანის საზღვარზე ინციდენტის შესახებ ინფორმაციას არ ფლობს. ამის შესახებ დღეს გამართულ ბრიფინგზე მინისტრის მოადგილე დავით ჯალაღანიამ განაცხადა. მისი თქმით, საგარეო უწყება დაინტერესდება ამ ფაქტით და საქართველოს მოქალაქის დასახმარებლად თავისი კომპეტენციის ფარგლებში შესაბამის რეაგირებას მოახდენს.
"ჩვენ შესაბამისი სტრუქტურები მოგვაწვდიან დამატებით ინფორმაციას და რეაგირებაც იქნება შესაბამისი", - განაცხადა ჯალაღანიამ.
კახეთის საინფორმაციო ცენტრის მიერ დღეს გავრცელებული ინფორმაციის თანახმად, აზერბაიჯანის რესპუბლიკის ზაქათალას რაიონის სოფელ ალიაბადის პირველი საშუალო სკოლის ქართული სექტორის დაწყებითი კლასების მასწავლებელს ელინათ საფაროვას, ლაგოდეხთან, საქართველო - აზერბაიჯანის საზღვარზე, აზერბაიჯანელმა მესაზღვრეებმა ქართული სახელმძღვანელოები ჩამოართვეს.