საფრანგეთის განვითარების ბანკის მიერ კავკასიაში კურორტების მშენებლობა საქართველოსთვის ტურიზმის განვითარების პერსპექტივას კიდევ უფრო გაზრდის. ამის შესახებ დღეს გამართულ ტრადიციულ ბრიფინგზე საქართველოს საგარეო საქმეთა მინისტრის მოადგილე ნინო კალანდაძემ განაცხადა.
"ამ საკითხზე დიდი ხანია მიმდინარეობდა მსჯელობა, რომ გამოყოფილიყო შესაბამისი ფინანსები. ჯერ ჩამოყალიბებული არ არის, რა სფეროებზე გავრცელდება და რა ფორმით განხორციელდება ევროპული ინვესტიცია კავკასიაში. თავისთავად, მისასალმებელია, რომ ტურიზმის სფეროში დაინტერესება არსებობს დიდი ევროპული სახელმწიფოების მხრიდან. ეს ნიშნავს, რომ მსოფლიო დაინტერესებულია ამ რეგიონით და ამასთან, არსებობს ჩვენი განვითარების პერსპექტივები", - განაცხადა ნინო კალანდაძემ.
რუსული მედიაში გავრცელდა ინფორმაცია, რომლის თანახმადაც საფრანგეთის სახელმწიფო ბანკი Caisse des Depots et Consignations ჩრდილოეთ კავკასიის კურორტების განვითარებისთვის 10 მილიარდ ევროს გამოყოფს.
