მუსიკოს ქეთი ფარესაშვილის განცხადებით, საქართველოში ჯაზის მოსმენა მოდაში შემოვიდა, ფესტივალები, უცხოელი ჯაზშემსრულებლები და კონცერტები ძალიან ხშირად ტარდება, ფესტივალებზე სიარული კი პრესტიჟულია, თუმცა მხოლოდ "სამარიაჟოდ".
"ჯაზი ძალიან ინტიმურია. ფესტივალებზე შეიძლება იმისთვის მიხვიდე, რომ იმარიაჟო. ბოლოს ფესტივალზე რომ ვიყავი, ყველაფერი ძალიან მომეწონა, ის ჯაზშემსრულებლებიც ვინც ჩამოიყვანეს, მაგრამ საშინელი გახმოვანება იყო. ფაქტობრივად, ვერ მოისმენდი. ამ ჟანრს არ ჰყავს ფართო მსმენელი, იმიტომ, რომ მასა ინტელექტუალი არ არის. შესაბამისად, ვინც ამ განხრას აირჩევს, ის შეჩვეულია, რომ მის კონცერტზე ცოტა ხალხი მივა, მაგრამ გემოვნებიანი. მე ნინო ჩხეიძის ან სოფო ნიჟარაძისნაირ სიმღერას რომ ვმღეროდე, დარწმუნებული ვარ, უფრო მეტი ყურადღება იქნებოდა ჩემ მიმართ", - განუცხადა "ჯი-ეიჩ-ენს" ქეთი ფარესაშვილმა.
კითხვაზე, მუშაობს თუ არა ახალ რეპერტუარზე, მუსიკოსი გვპასუხობს, რომ სულ მუშაობის პროცესშია, მაგრამ ამის აფიშირებას არც ერთ გადაცემაში არ მოახდენს.
"ჯაზი ისეთია, სადაც სულ მუშაობ. კლიპის გადაღებას არ ვგეგმავ საერთოდ. არც ერთი არხი არ არის იმ დონის, სადაც ამ ტიპის სიმღერები გავა. რაც შეეხება სამომავლო გეგმებს, იანვარში მინდა შვედეთიდან ჩამოვიყვანო მუსიკოსები და მათთან ერთად კონცერტი გავმართო", - აღნიშნა ფარესაშვილმა.
