სამოქალაქო მოძრაობის "სოლიდარობა უკანონო პატიმრებს" განცხადებით, ბრიტანული სასამართლო ექსპერტიზის ბიუროს მიერ ჩატარებული ექსპერტიზის დასკვნა მოითხოვს, ობიექტური და სწრაფი გამოძიების ჩატარებას ნიკა კვინტრაძის გარდაცვალების ფაქტზე და დამნაშავეთა დასჯას.
"სამოქალაქო მოძრაობა "სოლიდარობა უკანონო პატიმრებს" ეხმაურება ნიკა კვინტრაძის საქმესთან დაკვაშირებული მოვლენების განვითარების ფაქტებს. კერძოდ: "ბრიტანული სასამართლო ექსპერტიზის ბიუროს მიერ ახალგაზრდა იურისტთა ასოციაციის თხოვნით ჩატარებული ექსპერტიზის დასკვნა ადასტურებს, რომ კვინტრაძე 26 მაისს ნამდვილად ჰყავდათ სამართალდამცავი ორგანოების თანამშრომლებს დაკავებული და ბორკილდადებული, რითაც იზრდება ეჭვი, რომ სწორედ სამართალდამცავი ორგანოების წარმომადგენლები უშუალო კავშირში არიან მის გარდაცვალებასთან და ჩვენთვის არ არის სარწმუნო შინაგან საქმეთა სამინისტროს ოფიციალური საჯარო განცხადება, თითქოს კვინტრაძე გარდაცვლილი იქნა ნაპოვნი ერთ-ერთი მაღაზიის სახურავზე", - აღნიშნულია მოძრაობის მიერ გავრცელებულ განცხადებაში.
ბესელიას მოძრაობა მიიჩნევს, რომ აღნიშნული ექსპერტიზის დასკვნა ამხელს საქართველოს ხელისუფლებას, სამართალდამცავ ორგანოებს სიყალბეში და უმოქმედობაში, რაც სამოხელეო დანაშაულის ჩადენის მადასტურებელია და კიდევ უფრო ამძიმებს მომხდარ ფაქტს.
