კანონპროექტი, რომლის საფუძველზეც სახელმწიფო კომპანიების აქციათა ნაწილი საერთაშორისო ბირჟებზე გავა, განსახილველად მზადაა. ის პარლამენტში ოფიციალურად უკვე დარეგისტრირდა.
უმრავლესობის წევრების მიხეილ ცქიტიშვილისა და ზვიად კუკავას მიერ ინიცირებული კანონპროექტი წილებისა და აქციების პრივატიზებასთან დაკავშირებულ წესს არეგულირებს. მისი განხილვა საკანონმდებლო ორგანოში კომიტეტების დონეზე, სავარაუდოდ, უახლოეს მომავალში დაიწყება.
შეგახსენებთ, რომ საქართველოს მთავრობა სახელმწიფო კომპანიების აქციათა ნაწილს საერთაშორისო ბირჟებზე გაიტანს. "დღემდე ამის შესაძლებლობას, არსებული რეგულაციები არ გვაძლევდა და გვინდა განვიხილოთ შესაძლებლობა აქციათა 15-20 %-ის განთავსებისა, ლონდონისა და ვარშავის ბირჟებზე, როგორიცაა "საქართველოს რკინიგზა", "ნავთობისა და გაზის კორპორაცია", სახელმწიფო ელეტქროსისტემა" და სხვა სახელმწიფო კომპანიები,"- განაცხადა რამდენიმე კვირის წინ პრემიერ-მინისტრმა ნიკა გილაურმა. მისივე თქმით, აქციათა საერთაშორისო ბირჟებზე განთავსება საქართველოს საშუალებას მისცემს დიდი რაონებობით ახალი კაპიტალი მიზიდოს.
