კახეთში ყურძენს ჯერ 2 ღვინის ქარხანა იბარებს. როგორც კახეთის საინფორმაციო ცენტრს რთველის საკოორდინაციო შტაბის უფროსმა ტარიელ გაბუნიამ განუცხადა, საწარმოებში ამ დროისთვის სულ 110 ტონა ყურძენია ჩაბარებული.
მისივე თქმით, აქამდე ყურძენს წნორის ღვინის ქარხანა იბარებდა, დღეიდან კი ყურძნის მიღება თელავში, „თელიანი ველის" ქარხანამაც დაიწყო.
„თელიანი ველის" წარმომადგენლები თავად მიდიან ადგილზე და ვენახებს არჩევენ. მართალია, ჯერ შაქრიანობის გრადუსი დამაკმაყოფილებელი არ არის, მაგრამ შამპანურის დასამზადებლად დაბალი გრადუსიც აწყობთ. ჯერ შაქრიანობა 17,5 გრადუსია. მალე ნორმაზე დადგება და ყურძნის მიღებას სხვა ქარხნებიც დაიწყებენ", - აღნიშნა გაბუნიამ.
ღვინის ქარხნები ერთი კილოგრამი საფერავის ჯიშის ყურძენს 40 თეთრად იბარებენ და სუბსიდიის სახით დამატებით 25 თეთრი გაიცემა. რქაწითელში 30 თეთრს ღვინის ქარხანა იხდის, 15 თეთრი სუბსიდიიდან გაიცემა. რთველის სუბსიდირებისათვის წელს ბიუჯეტიდან 10 მილიონი ლარია გამოყოფილი.