კახეთის რეგიონის მოსახლეობა ყურძნის მოსავლიდან წელს 600 მილიონი ლარის შემოსავალს მიიღებს. ამის შესახებ საქართველოს სოფლის მეურნეობის მინისტრმა ბაკურ კვეზერელმა რეგიონში საქართველოს პრეზიდენტის მიერ გამართულ თათბირზე განაცხადა.
კვეზერელის თქმით, წელს კახეთში 150 ათას ტონა ყურძნის მოსავალს ელიან და 110 ათასი ოჯახი საშუალოდ 5 ათას ლარის შემოსავალს მიიღებს.
„გასულს წელს 100 ათასი ტონა მოსავალი გვქონდა, წელს კი 150 ათას ტონამდე ყურძნის მოსავალი გვექნება. ყურძნის გაყიდვიდან კახეთის რეგიონში დაახლოებით 60 მლნ. ლარი შევა. 110 ათას ოჯახზე მომავალი 45 დღის განმავლობაში საშუალოდ ოჯახზე 5000 ლარზე მეტი გამოდის", - განაცხადა სოფლის მეურნეობის მინიტრმა.
აღნიშნულ შემოსავალს და 100 ლარამდე გაზრდილ პენსიას საქართველოს პრეზიდენტი გარკვეულ სოციალურ შვებად მიიჩნევს.
"მართალია დიდი შემოსავალი არ არის, მაგრამ ამ შემოსავალს დავუმატოთ წელს გაზრდილი პენსია 100 ლარი, ამიტომ გარკვეული სოციალური შვებაა", - განმარტა საქართველოს პრეზიდენტმა.
