"მთავრია ამ ეტაპზე მოსავლის დაბინავებაა. შემდეგ მისი გადამუშავება და შემდგომ ახალ ბაზრებზე გასვლა. ვერ გაზრდი ფასს ვიდრე დეფიციტური მოთხოვნა არ იქნება. ჯერ უნდა ვისწავლოთ გასაღება და მერე მოიმატებს ფასი. წელს ყურძნის მეტი მოსავალია და უნდა ვეცადოთ, რომ არსებული ფასები უნდა "დავიჭიროთ", - განაცხადა ველისციხეში მყოფმა საქართველოს პრეზიდენტმა კახეთის გუბერნატორთან, რაიონის გამგებლებთან და სოფლის მეურნეობის მინისტრთან შეხვედრისას.

სოფლის მეურნეობის მინისტრი ამბობს, რომ ყველაფერი კეთდება იმისათვის, რომ "რთველი 2011" წარმატებული იყოს.

"ვეცდებით, რომ ჩვენი ორგანიზებულობით გქვონდეს მინიმუმ ის შედეგი, რაც გასულ წელს გვქონდა. მომავალი დღეების განმავლობაში გვექნება ყურძნის აქტიური გადამუშაცება და პროცესში აქტიურად ჩაერთვება ყველა მუნიციპალიტეტი. იმედი გვაქვს, რომ 25 ოქტომბრისთვის ყურძნის ძირითადი ნაწილის გადამუშავებას დავასრულებთ და რთველს საქართველოს სხვა რეგიონებშიც დავიწყებთ. მე მინდა დავპირდე მევენახეებს, რომ გვექნება ძალიან წარმატებული და ორგანიზებული რთველი. მუშაობს ცხელი ხაზები და შეუძლიათ დაკავშირება", - აღნიშნა ბაკურ კვეზერელმა.

პრეზიდენტი ამბობს, რომ შარშანდელი რთველი წარმატებული იყო და ის იყო დიდად განსხვავებული წინა წლების რთველისგან.