2011 წლის იანვრიდან ივლისის ჩათვლით, ყაზბეგს 35 000, მცხეთას კი 14 000 ტურისტი ეწვია. ამის შესახებ მცხეთა - მთიანეთის საინფორმაციო ცენტრს ყაზბეგის და მცხეთის მუნიციპალიტეტების გამგეობებში განუცხადეს.
ყაზბეგში ყველაზე მეტი ტურისტი ისრაელიდან, პოლონეთიდან და უკრაინიდან ჩადის. ვიზიტორები რეგიონს ძირითადად მყინვარის, სამების ტაძრის, დარიალის ხეობის, გველეთის ჩანჩქერის, თრუსოს და სნოს ხეობების, ჯუთას და ჭაუხების მოსანახულებლად სტუმრობენ.
მცხეთის მუნიციპალიტეტის ტურიზმის საინფორმაციო ცენტრის უფროსის ლალი რევიას თქმით, მცხეთაში ჩასული ვიზიტორების 60% ადგილობრივ მოსახლეობაზე მოდის, 40% კი უცხოელი ტურისტია.
„წელს მცხეთაში ყველაზე ბევრი ტურისტი - 2408 ვიზიტორი ისრაელიდან ჩამოვიდა,"- აღნიშნავს რევია. ისრაელს 1127 ტურისტით პოლონეთი მოსდევს, მესამე ადგილზე 1122 ვიზიტორით კი საქართველოა.
მცხეთაში ტურისტები ძირითადად სვეტიცხოველის, ჯვრის მონასტრის, სამთავროს, არმაზის ციხისა და მცხეთის არქეოლოგიური მუზეუმის მონახულების მიზნით ჩადიან.
„მცხეთა-ჯვრის მონასტრის საფეხმავლო მარშრუტზე ტურისტული ბილიკი ჯერ კიდევ მოსაწყობია: დასაყენებელია გზის მანიშნებლები, სამშენებლო ნარჩენები ზედ გზაზე ყრია, ჯვრის მონასტერთან მისასვლელად ტურისტებს მთავარი სამანქანო გზის გადაკვეთა უხდებათ. ასეთი უხერხულობის მიუხედავად, ვიზიტორებში ეს მარშრუტი მაინც ძალიან პოპულარულია," - ამბობს რევია. მისივე თქმით, მცხეთაში ჩასული უცხოელი ტურისტი დღეში საშუალოდ 80-100 ლარს ხარჯავს.
უცხოელი ვიზიტორების დიდი ნაწილი ღამის გასათევად საოჯახო სასტუმროებში ჩერდება.
