"საქართველოში იმდენად გვეჩქარება ყველაფერი, რომ ერთი წამი დრო არ არის დასაკარგი. როდესაც ბათუმში ახალი ოპერის თეატრი იხსნებოდა, მომღერლებს სარეაბილიტაციო სამუშაოს ფონზე, ნიღბებით უწევდათ რეპეტიციების გავლა და თეატრის სარეაბილიტაციო სამუშაო წარმოდგენამდე 20 წუთით ადრე დამთავრდა. დღეს იხსნება ანაკლია და აქაც ახლა ჭიმავენ ტროსებს,"-განაცხადა სააკაშვილმა.

პრეზიდენტმა გაიხსენა ის პერიოდიც, როცა ანაკლიაზე კურორტის გაკეთება გადაწყდა.

"რამდენიმე წლის წინ სანაპირო დაცვის კატარღით დავცურავდი დაცვასთან ერთად ოჩამჩირის გასწვრივ და გაფუჭდა კატერი. უკან დაბრუნებისას მეთევზებებმა გადაგვიყვანეს ანაკლიაში, ადგილობრივი ქობალიების ოჯახში. როდესაც ადგილობრივ ხალხს გავესაუბრე, მივხვდი, რა პოტენციალი იყო აქ. როდესაც მთელ საქართველოში წვიმს, აქ გამონაკლისია და არის სიმსუბუქისა და კომფორტის განცდა", - განმარტა ქვეყნის პირველმა პირმა.

მან აღნიშნა, რომ მაშინ აქ იყო რუსეთის სამშვიდობოების ცენტრი და პრეზიდენტის და შეიარაღებული დაცვის წევრების დანახვაზე განგაში გამოაცხადეს, გამოიყვანეს სამხედრო ტექნიკა, ავტომატები მოიმარჯვეს და მცირე სამხედრო ინციდენტიც კი მოხდა.

შეგახსენებთ, რომ ანაკლიამ დღეიდან საკურორტო ქალაქის სტატუსი შეიძინა. დამსვენებლებს იქ ესპანელი არქიტექტორის მიერ დაპროექტებული კილომეტრნახევრიანი ბულვარი დახვდებათ.

ანაკლიაში სასტუმროების, ფეხბურთის სტადიონების, კალათბურთის მოედნებისა და სხვა სპორტული თუ დასვენების ობიექტების მშენებლობა უკვე დაწყებულია. შენდება ორი ახალი სასტუმრო და ევროპაში ყველაზე დიდი, 540-მეტრიანი საფეხმავლო ხიდი, რომელიც ანაკლიას განმუხურთან დააკავშირებს.

დღეიდან ანაკლიაში გრანდიოზული აკვაპარკის მშენებლობაც დაიწყება. უკვე დასრულდა ევროპულ დიზაინზე მოწყობილი ამფითეატრი, რომელშიც დღეს ვახტანგ კახიძის დირიჟორობით სახელმწიფო სიმფონიური ორკესტრი დაუკრავს. ერთსაათიან კონცერტზე სოფო ხალვაში, ვაჟა მანია, ნატო გელაშვილი და გიორგი უშიკიშვილი იმღერებენ. კონცერტს ნინო სურგულაზე დაასრულებს სიმღერით - "აფხაზეთო ჩემო". ანაკლიის, როგორც საკურორტო ქალაქის, პირველი დღე გრანდიოზული ფოიერვერკით დასრულდება.

ანაკლიის განახლების იდეა პრეზიდენტს ეკუთვნის. შავი ზღვის ახალი კურორტის გახსნის ღონისძიების სამზადისი მიხეილ სააკაშვილმა რამდენიმე დღის წინ თავად მოინახულა. როგორც ანაკლიის პატრიოტთა ბანაკში სტუმრობისას პრეზიდენტმა აღნიშნა, დარწმუნებულია, რომ ანაკლია მალე შავი ზღვის მთელ სანაპიროზე საუკეთესო კურორტი გახდება.