კახეთში ელექტროენერგიის ინდივიდუალური გამრიცხველიანება ჩავარდა. ბოლო ორი თვის განმავლობაში, რეგიონის არცერთ სოფელში გამრიცხველიანების სამუშაოები არ მიმდინარეობს. კახეთის საინფორმაციო ცენტრის ინფორმაციით, ინვესტორი ნაკისრ ვალდებულებებს არ ასრულებს.
ს/ს „კახეთის ენერგოდისტრიბუციას" 2009 წლის იანვრიდან ლიტვური კომპანია „ახემა ჯგუფი" ფლობს. ხელშეკრულების მიხედვით ინვესტორმა შემდეგი ვალდებულებები იკისრა: 10 კვ-იანი, 04 კვ-იანი ქსელის და სატრანსფორმატორო პუნქტების განახლება; ახალი მომხმარებელის ქსელში ჩართვა ტექნიკური ექსპლუატაციის და უსაფრთხოების, წესების სრული დაცვით; ინდივიდუალური გამრიცხველიანება, ახალი თანამედროვე სტანდარტებით; არასტანდარტული სადენის შეცვლა სტანდარტულით; ამორტიზირებული ძველი საყრდენების, იზოლატორების შეცვლა.
ენერგეტიკის სამინისტროს ცნობით, 2010 წელს 20 000 აბონენტს უნდა ჰქონოდა თანამედროვე კარადაში დამონტაჟებული ინდივიდუალური მრიცხველი, რაც ვერ განხორციელდა.
„კახეთის ენერგოდისტრიბუციაში" ადასტურებენ, რომ ინვესტორი აღებულ ვალდებულებებს ვერ ასრულებს.
