კონსერვატიული პარტია და ეროვნული საბჭო გერმანიისა და ესპანეთის ხელისუფლებებს ბიძინა გიროგობიანის ქართული მხარისთვის გადმოცემაზე უარის თქმისკენ მოუწოდებენ.
კონსერვატიული პარტიის საერთაშორისო მდივნის და სატყეო დეპარტამენტის ყოფილი ხელმძღვანელის ბიძინა გიორგობიანის ესპანეთში დაკავების ფაქტთან დაკავშირებით კონსერვატიული პარტიის ერთ-ერთმა ლიდერმა ლაშა ჩხარტიშვილმა დღეს ბრიფინგი გამართა და აღნიშნა, რომ იმ შემთხვევაში, თუ ბიძინა გიორგობიანის საქართველოში ექსტრადირება მოხდება, მასზე განხორციელდება პოლიტიკური ანგარიშსწორება, ხოლო სააკაშვილის რეჟიმის პირობებში საქართველოს ციხეებში რეალური საფრთხის წინაშე დადგება მისი ჯანმრთელობა და სიცოცხლეც კი.
"ბიძინა გიორგობიანი დაკავებულ იქნა ამა წლის 8 აგვისტოს, ესპანეთის ქალაქ მანაკორთან მდებარე სასტუმროში, სადაც ის ოჯახის წევრებთან, მეუღლესთან და ორ შვილთან, ერთად იმყოფებოდა. მისი დაკავების საფუძველი გახდა ის გარემოება, რომ ბიძინა გიორგობიანი საქართველოს ხელისუფლების უკანონო მოთხოვნის თანახმად ინტერპოლის ძებნილთა წითელ ცირკულარის მიხედვით ძებნილად ითვლება, როგორც საქართველოს მოქალაქეა, მაშინ როდესაც ის დღეისათვის გერმანიის მოქალაქეა. აღსანიშნავია, რომ ბიძინა გიორგობიანთან ერთად არ ყოფილა დაკავებული არცერთი სხვა პირი", - აცხადებს ჩხარტიშვილი.
მისი შეფასებით, გიორგობიანის სისხლის სამართლებრივი დევნა და მის მიმართ 2008 წელს გამოტანილი განაჩენი სრულიად უკანონოა და ამის ერთადერთ საფუძველს წარმოადგენს სააკაშვილის რეჟიმის, უპირველესს ყოვლისა ვანო მერაბიშვილის მიერ მის მიმართ წარმოებული პოლიტიკური ანგარიშსწორება.
"აღნიშნულის მიზეზი კი ის გახლავთ, რომ 2004-2005 წლებში, სატყეო დეპარტამენტის ხელმძღვანელობისას, ბიძინა გიორგობიანი აქტიურად ეწინააღმდეგებოდა შინაგან საქმეთა მინისტრის, ასევე კონსტიტუციური უსაფრთხოების დეპარტამენტის ხელმძღვანელის დათა ახალაის უკანონო საქმიანობას, რაც კოკოითის რეჟიმთან ერთად ხე-ტყის მოპოვების დოკუმენტაციის გაყალბების გზით, მერქნული მასალებით უკანონო ვაჭრობას უკავშირდებოდა", - განაცხადა ლაშა ჩხატრიშვილმა.
