აფხაზეთის ე.წ. პრეზიდენტობის კანდიდატ სერგეი შამბას საარჩევნო შტაბი დე ფაქტო პროკურატურისგან და შსს-სგან გუშინ მომხდარი ავარიის გამოძიებას მოითხოვს.
აღნიშნულთან დაკავშირებით განცხადება სეპარატისტული რეჟიმის ე.წ. პრემიერ-მინისტრის შტაბის უფროსმა გურამ დოპუამ გაავრცელა.
"მივმართავთ გენერალურ პროკურატურასა და შინაგან საქმეთა სამინისტროს თხოვნით, რომ მომხდართან დაკავშირებით სრული მოკვლევა ჩაატაროს", - ნათქვამია განცხადებაში.
მათივე ინფორმაციით, 20 აგვისტოს, დაახლებით 13:30 საათზე გაგრის რაიონის სოფელ ბზიფთან ავტოავარია მოხდა, რომლის დროსაც ე.წ. პრეზიდენტობის კანდიდატმა სერგეი შამბამ მრავლობითი ტრამვა მიიღო.
შამბას კორტეჟი, რომელიც ქალაქ პიცუნდაში "ამომრჩეველთან" შესახვედრად მიდიოდა, მოპირდაპირე მხრიდან მოძრავ ავტოსატრანსპორტო საშუალებას შეეჯახა.
ე.წ. პრემიერის შტაბის მტკიცებით, ავარიული მდგომარეობა სწორედ მოპირდაპირე მხრიდან მოძრავმა ავტოსატრანსპორტო საშუალებამ შექმნა.
სერგეი შამბა გაგრის ჰოსპიტალშია გადაყვანილი. მისი სიცოცხლეს საფრთხე არ ემუქრება.
