ბუკნარში წყალსადენის მშენებლობა გადამწყვეტ ფაზაში შევიდა. აჭარის მთავრობის თავმჯდომარემ დღეს ქობულეთის რაიონის სოფელ ბუკნარის წყალსადენის სარეაბილიტაციო სამუშაოები მოინახულა.
"სოფელში სათავე ნაგებობის მშენებლობა წყლის დებეტის არარსებობის გამო ფერხდებოდა. ხუთი წელი დაგვჭირდა, რათა რესურსისთვის მიგვეგნო. 13 თვის შემდეგ თითოეულ ოჯახში სასმელი წყალი იქნება", - განაცხადა ლევან ვარშალომიძემ ადგილობრივ მოსახლეობასთან შეხვედრაზე.
აჭარის მთავრობის ინფორმაციით, ბუკნარში პროექტის მიხედვით დაგეგმილია: სათავე ნაგებობის მშენებლობა, 13-კმ-იან მონაკვეთზე 200 მმ-იანი მილსადენის მონტაჟი, ძველი რეზერვუარის რემონტი და ახალი სადეზინფექციო სადგურის მოწყობა. სამუშაოებს ახორციელებს ტენდერში გამარჯვებული სს "სპეცჰიდრომშენი". ბიუჯეტი კი - 989 999 ლარს შეადგენს.
სამუშაოები 14 ივნისს დაიწყო და 2012 წლის გაზაფხულზე დასრულდება. წყალსადენი 250 ოჯახს მოემსახურება, რომლებსაც წყალი 15 წელიწადზე მეტია, რაც არა აქვთ.
ადგილობრივებმა მთავრობის თავმჯდომარეს, წყლის სისტემის მოწესრიგების შემდეგ, გზის კეთილმოწყობა და გაზის მონტაჟი სთხოვეს.
