უფლებადამცველების შეფასებით, ბადრი ბიძაწის სასამართლო პროცესი პოლიტიკური ანგარიშსწორების ხასიათს ატარებს, რის კონტექსტშიც ისინი მოსამართლეს მოუწოდებენ სამართლიანობისა და კანონიერების პრინციპებით იხელმძღვანელონ.
"ჩვენთვის, უფლებადამცველებისთვის ხელისუფლების მხრიდან პოლიტიკური ანგარიშსწორების მაგალითები უცხო არაა. ხელისუფლების მიმართ კრიტიკულად განწყობილი პოლიტიკური და საზოგადოებრივი ჯგუფების საპროტესტო გამოსვლების პარალელურად იზრდება პოლიტიკური ნიშნით დაპატიმრებულ პირთა წრე და პოლიტიკური დევნის მაშტაბიც. ბოლო წლებში პოლიტიკური დევნის უტყუარობა დადასტურდა სხვადასხვა ევროპული ქვეყნების მიერ არაერთი პირისთვის პოლიტიკური თავშესაფრის მინიჭების ფაქტებით. ეს სია იზრდება, თუმცა ხელისუფლება პოლიტიკური ანგარიშსწორების განზრახვაზე ხელს არ იღებს. ჩვენ, უფლებადამცველებს მიგვაჩნია, რომ პოლიტიკური ანგარიშსწორების ხასიათს ატარებს ბადრი ბიძაწის სასამართლო პროცესი, სადაც ბრალდების მხარემ ვერ წარმოადგინა უტყუარი მტკიცებულებები წარდგენილი ბრალდების დასადასტურებლად და მხოლოდ დაუსაბუთებელი, პოლიტიკური ბრალდებების ფორმულირებით შემოიფარგლა. იმ მოწმეთა ჩვენებებზე დაყრდნობა, რომლებიც დაკავების დროს ფსიქოლოგიური და ფიზიკური ზეწოლის შედეგად იძლეოდნენ ჩვენებებს, არც შიდა ეროვნული კანომდბელობით და არც საერთაშორისო სტანდარტებით არ არის დაშვებული", - ნათქვამია უფლებადამცველების ერთობლივ მიმართვაში.
მათივე აზრით, 2010 წლის გამამატყუნებელი განაჩენების 99,9% სწორედ სასამართლოს პოლიტიზირებულობაზე მიუთითებს.
"სამწუხაროდ, პოლიტიკური ნიშნით დაპატიმრებულ და გასამართლებულ პირთა რაოდენობამ 26 მაისის შემდგომ არნახულად იმატა. ვინც, იღებს პროკურატურის პირობებს, მათთან ფორმდება საპროცესო შეთანხმებები დაბალი სასჯელების გამოყენებით, ხოლო ვინც ცდილობს საკუთარი უდანაშაულობა სამართლებრივი გზებით დაამტკიცოს და არც სხვა დააბრალოს დანაშაული ისჯება სასტიკად, როგორ მაგალითად შაქრო ზურაშვილი, რომელსაც სრულიად უსამართლოდ 12 წელი მიესაჯა. იგი არ დათანხმდა უკანონო გარიგებას, არც სხვისთვის დანაშაულის დაბრალების მოთხოვნას და ამისთვის სამაგალითოდ დასაჯეს. სასამართლო დამოუკიდებლობის გამოცდას გადის ყველა ისეთი საქმის გადაწყვეტილებით, რომლის მიმართ არსებობს საზოგადოების ინტერესი და პოლიტიკური მოტივაცია. ბადრი ბიწაძის სასამართლო გადაწყვეტილებით კიდევ ერთხელ წარმოჩინდება რამდენად დამოუკიდებელია საქართველოს სასამართლო ხელისუფლება პოლიტიკური ნებისგან. ჩვენ, უფლებადამცველებმა ყველა ასეთ საქმეზე რეაგირებით და მონიტორინგით, ყველაფერი უნდა გავაკეთოთ პოლიტიკური რეპრესიების შესაჩერებლად და სასამართლო დამოუკიდებლობის მისაღწევად. მოვუწოდებთ მოსამართლეებს იხელმძღვანელონ სამართლიანობისა და კანონიერების პრინციპებით და ნუ აღმოჩდებიან პოლიტიკური იარაღი აღმასრულებელი ხელისუფლების ხელში", - აღნიშნულია განცხადებაში.
შეგახსენებთ, რომ სასაზღვრო პოლიციის ყოფილი უფროსის, ბადრი ბიწაძის განაჩენი დღეს გამოცხადდება.
