სახალხო დამცველი სასჯელაღსრულების დაწესებულებებში არსებული გაუსაძლისი პირობების შესახებ საუბრობს.
როგორც სახალხო დამცველის აპარატის პრევენციისა და მონიტორინგის დეპარტამენტის თანამშრომლების მიერ პრევენციის ეროვნული მექანიზმის მანდატის ფარგლებში, გეგმიური მონიტორინგის შედეგებმა აჩვენა, ზოგიერთ დაწესებულებაში კვლავ პრობლემურია ექიმის მომსახურება, მედიკამენტებით უზრუნველყოფა; რამდენიმე დაწესებულებაში კვლავ არ არის ტელევიზორები; სასჯელაღსრულების სისტემაში პრაქტიკულად არ არსებოს მსჯავრდებულთა რესოციალიზაციის პროგრამები და არ ხდება მათი სათანადო მომზადება გათავისუფლებისათვის.
"კვლავ პრობლემად რჩება დახურულ დაწესებულებებში მოთავსებულ პატიმართა ყოფა. მათი მდგომარეობა მძიმდება ცხელი ზაფხულის პერიოდში, როდესაც საკნებში განსაკუთრებით გაუსაძლისი პირობებია შექმნილი. მდგომარეობას მეტ-ნაკლებად ამსუბუქებს ვენტილატორები, რომელთა შეძენაც შესაძლებელია დაწესებულებების მაღაზიებში, თუმცა სასჯელაღსრულების სისტემაში შრომითი, საგანმანათლებლო და სხვა ღონისძიებების არარსებობის გამო, დახურული დაწესებულებების პატიმრებს მინიმუმ 23 საათის განმავლობაში საკანში უწევთ ყოფნა, რაც კიდევ უფრო ამძიმებს მათ მდგომარეობას", - ნათქვამია სახალხო დამცველის აპარატის განცხადებაში.
უფრო დეტალურად მონიტორინგის შედეგები სახალხო დამცველის ანგარიშში აისახება.
