კულტურის მინისტრი ნიკა რურუა ადასტურებს, რომ რუსთაველის თეატრის სამხატვრო ხელმძღვანელობიდან რობერტ სტურუას გათავისუფლება ეთნიკური უმცირესობების მისამართით მის მიერ გაკეთებული განცხადებების გამო მოხდა.
"სტურუას გათავისუფლება ძალიან პრინციპული საკითხია. სახელმწიფო, რომელიც მოცემულობით არის მულტიეთნიკური და მულტიკულტურული, ვერ შეეგუება და ვერ დააფინანსებს ქსენოფობიას. ქსენოფობიაში იგულისხმება ის გამონათქვამები, ეთნიკური მეტაფორები, რომელსაც სტურუა იყებენდა მრავალრიცხოვანი ინტერვიუების დროს", - განაცხადა ნიკა რურუამ დღეს ბათუმში გამართულ ბრიფინგზე.
მისივე თქმით, სტურუას თანამდებობიდან მოხსნა მისთვის იოლად მისაღები და სასიამოვნო გადაწყვეტილება არ იყო, მაგრამ მიიჩნევს, რომ ტირაჟირებულ ქსენოფობიას მწვანე შუქი არ უნდა აეთოს დემოკრატიულ ქვეყანაში.
"მით უმეტეს, რომ ეს საქართველოს თავის თავზე ერთხელ უკვე ნაგემი აქვს. ერების დაყოფა კარგ და ცუდ ერებად, ადამიანების დაყოფა კლასებად - ეს იყო, რასაც აკეთებდნენ თვის დროზე ბოლშევიკები და ეს იცის ბატონმა სტურუამ, ის იცნობდა ბოლშევიკებს, ამას აკეთებდნენ თავის დროზე ნაცისტები", - განმარტა მინისტრმა, რომელიც დარწმუნებულია, რომ ჩვენი დაუძინებელი მტერი ამით აუცილებლად ისარგებლებს, თუ ამის საშუალება მიეცემა.
ამასთან, რურუას განმარტებით, რუსთაველის თეატრში სამხატვრო ხელმძღვანელის პოსტი არ გაუქმდება.
