"თავისუფალი საქართველოს" ლიდერი კახა კუკავა მოითხოვს, რომ დაუყოვნებლივ დაიწყოს მამუკა ზერეკიძის საქმეზე დამოუკიდებელი გამოძიება არასამთავრობო ორგანიზაციების მონაწილეობით და დაკვირვებით. კუკავამ დღეს გამართულ ბრიფინგზე საერთაშორისო ორგანიზაციებს მოუწოდა, რომ შეაჩერონ "დაკანონებული მკვლელობების სერია" საქართველოს ციხეებში.
"16 აგვისტოს, სასჯელაღსრულების მე-6 დაწესებულებაში გარდაიცვალა მამუკა ზრეკიძე. შეგახსენებთ, რომ მამუკა ზერეკიძე გახლდათ გიორგი ზერეკიძის მამა, რომელის დაპატიმრებასაც რამდენიმე წლის (მაშინ გიორგი ზერეკიძე 14 წელს მიუღწეველი პირი იყო) საზოგადოებაში სერიოზული ვნებათაღელვა მოჰყვა, ოჯახოს შეუპოვარმა პოზიციამ და შეურიგებელმა ბრძოლამ ხელისუფლების გაღიზიანება გამოიწვია და მოგვიანებით თავად მამუკა ზერეკიძეც იქნა დაპატიმრებული. ოფიციალური ვერსიით მამუკა ზერეკიძის დაღუპვა უბედურ შემთხვევას უკავშირდება, თითქოს მას ყავის მადუღარამ დენი დაარტყა. არაოფიციალური ინფორმაციით კი ცნობილია, რომ გარდაცვლილს თავის არეში აღენიშნება ტრავმული დაზიანებები. საქართველოში უკანასკნელი 1 წლის მანძილზე სასჯელაღსრულების დაწესებულებებში საეჭვო ვითარებაში ათეულობით პატიმარია გარდაცვლილი და არცერთი მათგანის გამოძიება არ მიმდინარეობს", - განაცხადა კუკავამ.
მისი თქმით, საქართველოს სასჯელაღსრულების სისტემაში არსებული ვითარება უკვე რეალურად შეიძლება შეფასდეს, როგორც წამების კარგად ორგანიზებული ინდუსტრია, რაც არაფრით არ ჩამოუვარდება არც ბოლშევიკური და არც ნაცისტური რეჟიმის მიერ შექმნილ ანალოგიურ სისტემებს.
