თუშეთში პირველი ქრისტიანული ეკლესია ინგრევა. გომეწრის ხეობის სოფელ ბოჭორნაში მე-19 საუკუნეში აგებულ ღვთისმშობლის სახელობის ტაძარს გუმბათი უკვე ჩამოექცა, მთლიანად არის დანგრეული საკურთხეველი, კედლებიდან კი ქვები ცვივა და იშლება.
ეკლესია სიპის ქვით, კირის გარეშეა აგებული.
თუშების თქმით, დახმარებისთვის რაიონის ხელმძღვანელობას მიმართეს, მაგრამ უშედეგოდ. „ეკლესია საკუთარი ძალებით დავასუფთავეთ. უნიკალური საეკლესიო ნივთებია აღმოჩენილი. მათ შორის სპილენძის ემბაზი, რომელშიც ადგილობრივები ინათლებოდნენ", - განუცხადა კახეთის საინფორმაციო ცენტრს ბოჭორნის მკვიდრმა ირაკლი ხვეთაგურიძემ.
ახმეტის მუნიციპალიტეტის გამგეობის კულტურის სამსახურში აღნიშნეს, რომ თუშეთში პირველი ქრისტიანული ეკლესიის ნგრევის შესახებ მათთვის ცნობილია. „ინფორმაცია კულტურის სამინისტროს მივაწოდეთ. ტაძრის რეაბილიტაცია მხოლოდ მათი ნებართვის შემდეგ არის შესაძლებელი", - აღნიშნა კულტურის სამსახურის სპეციალისტმა ელდარ ჭაჭიაშვილმა
