სარკინიგზო მაგისტრალზე მომხდარი ავარიის სავარაუდო მიზეზი ცნობილია.
საქართველოს რკინიგზის დეპარტამენტის ხელმძღვანელის, ირაკლი ეზუგბაიას ინფორმაციით, ავარია ერთ-ერთი ვაგონის დაზიანებამ გამოიწვია, რომელიც სარკინიგზო შემადგენლობაში იყო ჩაბმული.
„ახლა ჩვენი ამოცანაა სწრაფად აღვადგინოთ მოძრაობა. რაც შეეხება ავარიის ზუსტ მიზეზებს, შესაბამისი მოკვლევა მალე დაიწყება", - განმარტა ეზუგბაიამ.
შეგახსენებთ, რომ დასავლეთ საქართველოს მიმართულებით სარკინიგზო მიმოსვლის პარალიზება გუშინ მოხდა. ამის მიზეზი მცხეთის მე-18 კილომეტრზე მომხდარი ავარიაა, რომლის შდეგად 10-ზე მეტი ვაგონი ლიანდაგიდან გადავარდა და ამობრუნდა.
ავარიის შედეგად, დიდი ოდენობით ნავთობი დაიღვარა. შემთხვევის ადგილზე სახანძრო, სამაშველო სამსახურების ბრიგადები და სამართალდამცველები მუშაობენ.
ამ დროისთვის მაგისტრალზე მოძრაობა ნაწილობრივ აღდგენილია. მცხეთაში გადაადგილება ორივე მიმართულებით მხოლოდ ერთ ლიანდაგზე ხორციელდება. მოძრაობა ამაღამ აღდგება.
