საქართველოს პრეზიდენტი მიხეილ სააკაშვილი ლევან ვარშალომიძის მუშაობით კმაყოფილია და მას ბათუმის აღმშენებლობისთვის მადლობას უხდის.
"ბათუმში ჯერ კიდევ ძალიან დიდი სიღარიბეა და გაჭირვებაა. მართალია, უმუშევრობა ისევ არის, თუმცა კი ბევრად შემცირდა. ხუთი წლის წინათ კანალიზაციისა და წყალსადენის სარეაბილიტაციო სამუშაოები დავიწყეთ და ეს სისტემები ბათუმში უკვე მთლიანად შევცავალეთ. ეს ნიშნავს იმას, რომ აქ 300 ათას ოჯახს ევროპაში საუკეთესო წყალსადენისა და კანალიზაციის სისტემა ექნება. ეს ნიშნავს იმას, რომ ბათუმის მოსახლეობა, რომელიც მომავალი წლის დასაწყისში, რაოდენობრივად, 200 ათასი იქნება, მოდერნიზაციის 2015 წლის გეგმის მიხედვით, 300 ათასს მიაღწევს... მომავალ ზაფხულს ფოთში ახალი, დიდი, საერთაშორისო კლასის აეროპორტი იხსნება, მომავალი წლის შემოდგომით კი ქუთაისში მეორე დიდი აეროპორტი გვექნება. 2014-15 წლებში აქ ჩქარი რკინიგზა გაივლის, რომლის მშენებლობის პირველი ეტაპი 2013 წელს დასრულდება. 2013 წელს დამთავრდება ავტობანის მშენებლობაც... ეს ნიშნავს იმას, რომ ბათუმი ყველასთვის ძალიან ადვილად ხელმისაწვდომი გახდება. ფრენას იწყებს ავიაკომპანია Ryanair და სხვა იაფი ავიაკომპანიები. მომავალ წელს აქ შემოვა მსოფლიოში ყველაზე დიდი საკრუიზო კომპანიები, მაგალითად, Royal Caribbean, რომელიც შავი ზღვის მხოლოდ სამ ქალაქში შემოდის: ბათუმში, იალტასა და სტამბულში. ყოველივე ეს დამატებით მილიონობით ტურისტის ჩამოსვლას განაპირობებს... ეს ამ ადგილის ხელმძღვანელების ლევან ვარშალომიძის დამსახურებაა", - განაცხადა პრეზიდენტმა ბათუმში სასტუმრო "რედისონის" გახსნისას.
ამასთან, ქვეყნის პირველი პირის შეფასებით, ქვეყნის აღმშენებლობასა და კონკრეტულად ბათუმში მიმდინარე მშენებლობების ბუმს ბიზნესსა და სახელმწიფო სექტორს შორის ძალიან კარგი პარტნიორობაც და ისიც განაპირობებს, რომ "ჩვენი ქვეყნის მომავალს რწმენითა და ენთუზიაზმით ვაშენებთ, გვაქვს ენერგია, სიცოცხლის ხალისი და ოპტიმიზმი".
"ქვეყანა, რომლის ტერიტორიის 20 პროცენტი ოკუპირებულია, რომელსაც ყოველდღიურად ემუქრებიან და ბოლო წლებში ყველანაირი ქარტეხილი შეეხო, გადაიქცა ყველაზე დინამიკური განვითარების, რეფორმების ნიმუშად მთელი მსოფლიოს მასშტაბით.
ეს ხდება იმიტომ, რომ მთავრობა არ იპარავს, არც ერთი მინისტრი, მინისტრის მოადგილე, გამგებელი თუ სამოქალაქო პირი არ არის კორუმპირებული და თუ კიდევ დარჩა ასეთი, მასაც ადგილს მივუჩენთ.
როდესაც მთავრობა არ იპარავს, ორგანიზებულად ვმოქმედებთ და ხალხი დღე და ღამე მუშაობს, ყველაფერს შევძლებთ", - აღნიშნა მიხეილ სააკაშვილმა, რომლის თქმითაც, "ყველაფერს მივაღწიეთ არა იმიტომ, რომ ჩვენ კარგი კანონები გვაქვს (თუმცა-კი ნამდვილად კარგი კანონები გვაქვს); არა იმიტომ, რომ ძლიერი და კარგად ორგანიზებული მთავრობა გვყავს (თუმცა კი ჩვენი მთავრობა მართლაც ძლიერი და კარგად ორგანიზებულია), არამედ იმიტომ, რომ ყველანი ერთად ვართ და გვჯერა - ყველაფერი შესაძლებელია".
