ევროზონის წევრი ქვეყნების ლიდერები დღეს საბერძნეთის კრიზისზე იმსჯელებენ. ამავე დროს, ისინი შეეცდებიან, გამონახონ გზები, რათა ანალოგიური პრობლემები ევროპის სხვა ქვეყნებში არ განმეორდეს. დღის წესრიგშია მთელი რიგი საკითხების განხილვა, მათ შორის საბერძნეთისთვის ახალი კრედიტის გამოყოფის შესახებ.
გავრცელებული ინფორმაციით, განხილულ იქნება საკითხი საბანკო საქმიანობის გადასახადის შემოღების თაობაზეც.
სამიტის წინ გერმანიის კანცლერმა ანგელა მერკელმა განაცხადა, რომ დღევანდელი შეხვედრისგან მნიშვნელოვანი ოპტიმიზმის განცდა არ უნდა დარჩეს.
გუშინ საღამოს კი მერკელმა და საფრანგეთის პრეზიდენტმა საბერძნეთის კრიზისთან დაკავშირებით ერთობლივი პოზიცია შეათანხმეს. ფანგულ-გერმანული წინადადებები ბრიუსელის სამიტის დაწყებამდე ევროკავშირის პრეზდენტ ჰერმან ვან რომპეის გადაეცემა.
უნდა აღინიშნოს, რომ საბერძნეთმა პირველი ფინანსური დახმარება გასული წლის მაისში მიიღო, თუმცა ამ ქვეყნის ვალების კრიზისი მსოფლიო საფინანსო ბაზრების სტაბილურობას საფრთხეს უქმნის. საუბარია თვით ევროს მომავალზეც.
პოლიტიკოსები და ინვესტორები მოითხოვენ გადამწვეტი ნაბიჯების გადადგმას, რათა ერთხელ და სამუდამოდ დასრულდეს ეს კრიზისი.
"ჩვენ არ უნდა მოვექცეთ ილუზიის ქვეშ. ვითარება ძალიან სერიოზულია და ის მოითხოვს პასუხს. აქ საუბარია ევროპის ვალუტის მომავალზე, წინააღმდეგ შემთხვევაში უარყოფითი შედეგები ევროპის ფარგლებს გარეთაც იჩენს თავს", - განაცხადა ევროკომიის თავმჯდომარე ჟოზე მანუელ ბაროზომ.
საერთაშორისო სავალუტო ფონდმა ევროპის ლიდერებს გადამწვეტი ქმედებებისკენ უკვე მოუწოდა. ფონდი მიიჩნევს, რომ პრობლემის გაჭიანურება მსოფლიო ეკონომიკას ძალიან ძვირად დაუჯდება.
