ავღანეთი მზადაა ევროპა-აზიის სატრანსპორტო პროექტის TRACECA-ს ფარგლებში, საქართველოსთან აქტიურად ითანამშრომლოს. ეკონომიკისა და მდგრადი განვითარების სამინისტროს ინფორმაციით, 2-3 ივლისს ავღანეთში (ქ. ქაბული) ოფიციალური ვიზიტით იმყოფებოდა საქართველოს ეკონომიკისა და მდგრადი განვითარების სამინისტროს დელეგაცია, რომელსაც ხელმძღვანელობდა მინისტრის მოადგილე გიორგი კარბელაშვილი.
ვიზიტის ფარგლებში გაიმართა შეხვედრები ავღანეთის კომერციისა და მრეწველობის მინისტრთან და ტრანსპორტის მინისტრის მოადგილესთან, რომლის დროსაც ყურადღება გამახვილდა საქართველოსა და ავღანეთს შორის სავაჭრო-ეკონომიკური თანამშრომლობის საკითხებზე. მიმდინარე ეტაპზე, მსგავსი შინაარსის სახელმწიფოთაშორისი შეთანხმებები გაფორმებული არ არის. შეხვედრებისას გამოიკვეთა ორ ქვეყანას შორის თანამშრომლობის შემდეგი სფეროები: სავაჭრო შეთანხმების გაფორმება; სამოქალაქო ავიაციის დარგში შეთანხმების მიღწევა; საერთაშორისო საავტომობილო შეთანხმების გაფორმება; საქართველოსა და ავღანეთის საჰაერო ნავიგაციის სააგენტოებს შორის თანამშრომლობის შესახებ მემორანდუმის (MOU) გაფორმება.
ავღანეთის მაღალი თანამდებობის პირებმა ქართველი კოლეგებისგან მიიღეს დეტალური ინფორმაცია საქართველოს სატრანსპორტო სექტორში განხორციელებული რეფორმების შესახებ. თავის მხრივ, ავღანეთის მხარემ გამოთქვა მზადყოფნა, აქტიურად ითანამშრომლოს ევროპა-აზიის სატრანსპორტო პროექტის TRACECA-ს ფარგლებში. ავღანეთი დაინტერესებულია ენერგომატარებლების, სამრეწველო და სავაჭრო რესურსების სატრანზიტო მიმართულებების დივერსიფიცირებაში და ამ თვალსაზრისით, იგი განიხილავს საქართველოს, როგორც ერთ-ერთ ალტერნატიულ მიმართულებად.
შეხვედრებისას ასევე გამახვილდა ყურადღება ავღანეთთან საქართველოს ურთიერთობის კიდევ ერთი პრიორიტეტული მიმართულებაზე. საერთაშორისო კოალიციის წევრ სხვა ქვეყნებთან, საქართველო მონაწილეობს ავღანეთის სამშვიდობო მისიაში და წვლილი შეაქვს ქვეყნის უსაფრთხოების განმტკიცებისა და აღორძინებაში.
