მენეჯმენტ კომპანია „დექსუსი" „ცენტრ პოინტის" შეჩერებული პროექტების განახლებას აგრძელებს. მორიგი ობიექტი, რომლის მშენებლობაც დღეს განახლდა, სააკაძის მოედანზე მდებარე საცხოვრებელი და სავაჭრო კომპლექსია. სამშენებლო სამუშაოების დაწყებას „დექსუსის" მენეჯმენტთან ერთად დღეს კომპლექსის მომავალი მობინადრეებიც დაესწრნენ.
სააკაძის კომპლექსი მე-11 ობიექტია, რომელზეც მუშაობა „დექსუსმა" „ცენტრ-პოინტის" მართვაში აღების შემდეგ დაიწყო. 10 ბლოკიანი კომპლექსი ერთ-ერთი მასშტაბური პროექტია და მისი დასრულების შემდეგ საცხოვრებელ და სავაჭრო ფართს 450-მდე მომხმარებელი მიიღებს. მათი ბინები „ცენტრ პოინტს" 2008 წელს უნდა დაესრულებინა, თუმცა სამშენებლო სამუშაოები ბოლო 3 წელი შეჩერებული იყო. „დექსუსი" კომპლექსის მშენებლობას სამ ეტაპად განახორციელებს. პირველ ეტაპში, რომელიც საფასადე სამუშაოების მთლიან შესრულებას მოიცავს, კომპანია 2,2 მილიონი ლარის ინვესტიციას ჩადებს. პირველი ეტაპი 2012 წლის 28 მარტს დასრულდება და პარალელურად, გამოცხადდება მომდევნო ეტაპების დაწყება-დასრულების თარიღებიც.
„დექსუსის" დირექტორის გიორგი ქანანაშვილის განცხადებით, იმ განახლებული პროექტების რიცხვი, რომელთა მშენებლობაც გაურკვეველი ვადით იყო შეჩერებული, ყოველთვიურად იმატებს, რაც როგორც კომპანიისთვის, ისე მომხმარებლებისთვის, მნიშვნელოვანი შედეგია: „სააკაძის მოედანზე მდებარე კომპლექსის განახლება განსაკუთრებით მნიშვნელოვანია, ვინაიდან მისი დასრულების შემდეგ კუთვნილ ფართს 450-მდე მომხმარებელი მიიღებს. ეს უკვე მე-11 პროექტია, რომელზეც „ცენტრ პოინტის" მართვის აღების შემდეგ დავიწყეთ მუშაობა, რამდენიმე დღეში კი კიდევ ერთ ობიექტს განვაახლებთ და მომავალშიც მუშაობას ასეთივე აქტიური ტემპით გავაგრძელებთ",-აცხადებს გიორგი ქანანაშვილი.
„დექსუსმა" „ცენტრ-პოინტის" მართვაში აღების შემდეგ 5 პროექტი უკვე დაასრულა და ფართები 625 მომხმარებელს გადასცა. სააკაძის კომპლექსის გარდა, მუშაობა ამჟამად 5 პროექტზე მიმდინარეობს, რომელთაგან 4 შემოდგომაზე, ერთი კი - მომდევნო წლის მარტში დასრულდება. ივლისის ბოლომდე „დექსუსი" სამშენებლო სამუშაოებს ხოშარაულის ქუჩაზე მდებარე მეოთხე კორპუსში, ე.წ „ხერხზეც" განაახლებს.
"დექსუსმა" სამშენებლო ბაზრის ყველაზე მსხვილი, „ცენტრ პოინტის" ქოლგის ქვეშ გაერთიანებულ კომპანიათა ჯგუფის 100%-ანი წილი მართვაში 2010 წლის სექტემბერში აიღო. „დექსუსის" მართვაში შესვლამდე პროექტებში სამშენებლო სამუშაოები პრაქტიკულად შეჩერებული იყო. კომპანიის მიერ შემუშავდა „ცენტრ პოინტის" რეაბილიტაციის გეგმა. გეგმის მიხედვით, 2013 წლის ბოლომდე „ცენტრ პოინტის" ყველა მომხმარებელი უნდა დაკმაყოფილდეს.