უკრაინაში საქართველოს საელჩოს თანამშრომელმა უკრაინული ინტერნეტ-პორტალის "კომენტარი"-ს ჟურნალისტი სცემა, რომელიც კიევში ქალების მოძრაობა "ფემენ" -ის საპროტესტო აქციას იღებდა. განცხადება ამის შესახებ თავად ჟურნალისტმა გააკეთა.
ჟურნალისტის ინფორმაციით, აქტივისტი ქალები საპროტესტო თეატრალიზებულ აქციას საელჩოსთან საქართველოში ჯაშუშობის ბრალდებით დაკავებული ფოტოკორესპოდენტების მხარდასაჭერად მართავდნენ.
აქციის მონაწილეებს ხელში ეკავათ პლაკატები, რომლებზეც გადახაზული ფოტოაპარატი ეხატა.
"ამ დროს საელჩოს შენობიდან გამოვიდა მამაკაცი, რომელმაც თავი არავის გააცნო და დაიწყო აქციის მონაწილეთა გაყრა. შემდეგ კი ფოტოგრაფების აპარატურას ურტყამდა და მოითხოვდა ოპერატორებს გადაღება შეეწყვიტათ. ჟურნალისტების აღშფოთებაზე მამაკაცმა "კომენტარი"-ს ფოტოკორესპოდენტს თავში ჩაარტყა. ამჟამად ჟურნალისტი კლინიკაში იმყოფება და გამოკვლევას იტარებს", _ იუწყება უკრაინული მედია.
მათივე ინფომმაციით, დაზარალებული ვარაუდობს, რომ შესაძლოა მას ტვინის შერყევა აქვს. მისივე თქმით, აღნიშნულთან დაკავშირებით, მან სამართალდამცავებს უკვე მიმართა.
