მათი ინფომაციით, ერთ-ერთმა მედიასაშუალებამ გაავრცელა გაზეთ „ქრონიკის" რედაქტორის განცხადება, თითქოს სახალხო დამცველი და მისი რმუნებულები უყურადღებობას იჩენენ დაპატიმრებული ფოტორეპორტიორების მიმართ და არ მისულან მათ სანახავად.

„სახალხო დამცველის საზოგადოებასთან ურთიერთობის დეპარტამენტი კიდევ ერთხელ შეახსენებს დაინტერესებულ პირებსა და მედიასაშუალებებს, რომ, საქართველოს სახალხო დამცველის რწმუნებულებმა დაკავებული ფოტორეპორტიორები ირაკლი გედენიძე, ზურაბ ქურციკიძე და გიორგი აბდალაძე მოინახულეს ოთხჯერ - 7 და 8 ივლისს თბილისის დროებითი მოთავსების #1 იზოლატორში, ხოლო 9 და 11 ივლისს სასჯელაღსრულების დეპარტამენტის #8 სასჯელაღსრულების დაწესებულებაში", - ნათქვამია განცხადებაში.
ამასთან, ომბუდსმენის აპარატში აღნშნავენ, რომ სახალხო დამცველის წარმომადგენლები რეგულარულ მონიტორინგს ახორციელებენ დაკავებულთა განთავსების პირობებსა და მათი ჯანმრთელობის მდგომარეობაზე.

ამასთან, სახალხო დამცველმა ასევე მოითხოვა ფოტორეპორტიორების საქმის გასაჯაროება.
„აღნიშნული საქმის გამოძიების მიმართ საზოგადოების მაღალი ინტერესის გამო და იმის გათვალისწინებით, რომ ბრალდებული პირები ფოტორეპორტიორები არიან, მნიშვნელოვანია გამოძიების მწარმოებელი ორგანოს მიერ მოხდეს იმ დოკუმენტების საქმის სხვა მასალებისაგან გამიჯვნა, რომელიც არ შეიცავს სახელმწიფო საიდუმლოებას. აქვე აღსანიშნავია, რომ საქმის მასალათა ნაწილი თავად გახადა საჯარო გამოძიების მწარმოებელმა ორგანომ. შესაბამისად, თუ დაცვის მხარე მიიჩნევს, რომ მნიშვნელოვანია საჯარო გახადოს საქმეში არსებული რომელიმე მტკიცებულება, აუცილებელია გამოძიების მწარმოებელი ორგანოს მხრიდან ზუსტად მოხდეს კონკრეტული მტკიცებულების შეფასება და მისი საიდუმლოების საკითხის გადაწყვეტა", - ნათქვამია განცხადებაში.