საქართველოს სახალხო დამცველის გიორგი ტუღუში 26 მაისის მოვლენებთან დაკავშირებით შინაგან საქმეთა სამინისტროს მიერ განხორციელებული რეაგირებას არსაკმარისად მიიჩნევს.
როგორც "ჯი-ეიჩ-ენს" ომბუდსმენის აპარატიდან აცნობეს, სახალხო დამცველი მიიჩნევს, რომ შინაგან საქმეთა სამინისტროს მიერ განხორციელებული რეაგირება მნიშვნელოვანია, თუმცა არსაკმარისი.
"როგორც ჩვენთვის ცნობილია პასუხისგებაში მიეცნენ მხოლოს ის პირები, რომლებმაც უშუალოდ აქციის დაშლისას გადაამეტეს საკუთარ უფლებამოსილებას. სახალხო დამცველის აზრით აუცილებელია გაგრძელდეს ძიება ყველა იმ ფაქტზე, რომელიც სახალხო დამცველისთვის გახდა ცნობილი და შესწავლის შემდგომ რეაგირებისთვის გადაეგზავნა საქართველოს მთავარ პროკურატურას. აქვე აღვნიშნავთ, რომ დისციპლინურ პასუხისგებაში მიცემული პირების დასჯა წინგადადგმული ნაბიჯია და მნიშვნელოვანია იმ კუთხით, რომ მას პრევენციული ხასიათი ექნება სხვა პოლიციელთა მიმართ", - ნათქვამია სახალხო დამცველის განცხადებაში.
მათივე ინფორმაცით, საუბარი დაკავებული პირების მიმართ არასათანადო მოპყრობისა და ცემის ფაქტებზე, რომლებიც უკვე აღარ იმყოფებოდნენ რუსთაველის გამზირზე.
„ჩვენს მიერ დაფიქსირებულ უფლებადარღვევათა ნაწილი შეიცავდა დანაშაულის ნიშნებს და შესაბამისად საჭიროა სამართალდამცავი ორგანოების მხრიდან მათზეც განხორციელდეს ადეკვატური რეაგირება და დადგეს უფლებადამრღვევთა პასუხისმგებლობის საკითხი", - ნათქვამია განცხადებაში.
შეგახსნებთ, რომ საქართველოს შინაგან საქმეთა სამინისტრომ 26 მაისს, რუსთაველის გამზირზე აქციის დაშლაში მონაწილე 16 პოლიციელი დისციპლინური წესით დაისაჯნენ. მათ მიმართ გამოყენებული იქნა სხვადასხვა სახის დისციპლინური პასუხისმგებლობის ზომა, მათ შორის 4 შემთხვევაში დაკავებული თანამდებობიდან გათავისუფლება.
